Markaðs­mis­notkunar­málið: „Engin áhætta í þessu fyrir mig”

Egill Ágústsson, eigandi eignarhaldsfélagsins Desulo Trading Ltd, bar vitni í markaðsmisnotkunarmáli Kaupþings í Héraðsdómi Reykjavíkur í dag. Nokkrir fyrrverandi starfsmenn og stjórnendur Kaupþings eru ákærðir fyrir markaðsmisnotkun og umboðssvik venga hlutabréfakaupa Desulo í bankanum á árinu 2008, þeirra á meðal eru Hreiðar Már Sigurðsson, Sigurður Einarsson og Magnús Guðmundsson.

Félagið keypti tæplega 18 milljónir hluta í bankanum og lánaði Kaupþing Desulo að fullu fyrir kaupunum, að því er segir í ákæru. Veð fyrir láninu var tekið í bréfunum sjálfum en Egill skýrði frá því fyrir dómi í dag hvernig viðskiptin komu til.

„Einar Bjarni Sigurðsson [starfsmaður Kaupþings í Lúxemborg og viðskiptastjóri Egils] hafði samband við mig að beiðni Hreiðars Más Sigurðssonar og Magnúsar Guðmundssonar. Einar sagði að þeir vildu gjarnan fá mig í hluthafahóp Kaupþings en ég átti engin hlutabréf þá í Kaupþingi.”

Allt í einu búið að kaupa þessi bréf

Egill skýrði svo frá því að hann hefði sagt við Einar að hann hefði ekki hug á að kaupa nein hlutabréf.

„En þá býður hann mér þessi hlutabréf eingöngu með veði í bréfunum sjálfum og að ég þurfi ekki að leggja fram neinar tryggingar.”

Einar sagði Agli síðan að hluturinn í Kaupþingi geti orðið allt að 1% en hann hafi ekki sagt nákvæmlega hversu mikill.

„En svo gerast hlutirnir mjög hratt og allt í einu er bara búið að kaupa þessi bréf. Þannig gerðust fyrstu viðskiptin. [...] Það var aldrei óskað eftir því að ég legði fram neitt eigið fé og ég vildi það alls ekki en það var sem sagt engin áhætta í þessu fyrir mig.”

Aðspurður kvaðst Egill ekki hafa fylgst með því sjálfur hvernig viðskiptin voru gerð.

Bréfin keypt að Agli forspurðum

„Ég sá það bara í skýrslum um málið að þetta var alveg fram í september en mig minnir að frá því í maí hafi aldrei verið haft neitt samband við mig út af þessu. Bréfin voru bara keypt. [...] Það var gert að mér forspurðum.”

Saksóknari spurði Egil hvort hann hefði undirritað einhverja pappíra tengdum viðskiptum sagði hann svo ekki vera. Hann var þá spurður hvenær hann hefði komist að þessum miklum viðskiptum sem Desulo átti með hlutabréf í Kaupþingi.

„Þegar ég las Rannsóknarskýrslu Alþingis,” svaraði Egill þá.

Kannast ekki við að hafa verið agressívur fjárfestir

Kristín Edwald, verjandi Magnúsar Guðmundssonar, spurði Egil því næst út úr og kom þá fram að Einar Bjarni sagði við skýrslutöku hjá lögreglu að Egill hefði verið “aggressívur fjárfestir.” Egill vildi ekki kannast við þessa lýsingu á sjálfum sér.

Þá kom jafnframt fram að Egill hafði undirritað skjal þar sem hann gerðist “beneficial owner” félagsins Desulo. Kristín sagði að það væri því ekki rétt hjá honum að hann hefði ekki undirritað nein skjöl.

„Þetta eru einu skjölin sem ég undirritaði, þessi upphafsskjöl. Annað ekki. Þeir framkvæmdu þetta án minnar vitneskju, kaupin voru ekki borin undir mig,” sagði Egill.

Hann sagði svo að hann hefði beðið Einar um að losa sig út úr félaginu því honum hafi fundist þetta orðið “óþægilegt” og hann var „kominn í vandræði út af þessu.”

Þessi orð Egils stangast á við skýrslu Einars Bjarna hjá lögreglu þar sem hann sagði að Egill hefði aldrei beðið beint um að hann yrði leystur undan félaginu. Fyrir dómi í dag sagði Egill að þetta væri einfaldlega ekki rétt hjá Einari.

Einar Bjarni og Egill náskyldir

Kristín spurði hann þá hvort hann hafi sagt Einari í nóvember 2009 að hann vildi selja Desulo. Egill kvaðst ekki muna það en Kristín sagði þá að salan hafi farið fram á þessum tíma og sagði það því ekki geta verið rétt að Egill hafi ekkert vitað um Desulo eða viðskipti félagsins fyrr en eftir að rannsóknarskýrslan kom út í apríl 2010.

„Ég sagði að ég vissi ekki fyrr en þá hversu mikið umfangið var í kaupunum. Ég bara vissi að það hefðu verið keypt bréf en ekki hversu mikið.”

Við lok skýrslutökunnar spurði Kristín svo út í tengsl Egils og Einars Bjarna. Kom þá í ljós að Einar Bjarni er systursonur konu Egils.