Andstæðingur Gunnars mun fara hratt upp metorðalistann | Myndband

„Gunnar er í mjög góðu standi og þetta verður örugglega stærsti bardagi hans ferils ásamt þeim síðasta,“ segir faðir Gunnars, Haraldur Nelson, en hann er að koma til Las Vegas í fyrsta skipti og finnst mikið til alls koma.

Andstæðingur Gunnars er hörkunagli frá Bandaríkjunum sem heitir Brandon Thatch. Hann er áræðinn bardagamaður og mikill rotari.

Viðtalið í heild sinni má sjá í spilaranum neðst í fréttinni.

Stórhættulegur

„Hann er vafalítið langsterkasti andstæðingur Gunnars hingað til ásamt Rick Story. Gunni verður að passa sig á honum. Þetta gæti orðið mjög áhugaverð rimma um hver stýrir því hvert bardaginn fer. Gunni á meira í hann standandi en Thatch gegn Gunnari í gólfinu. Báðir hafa þeir auðvitað sínar sterku hliðar. Brandon hefur unnið ellefu bardaga í fyrstu lotu og ég held fjóra á undir 20 sekúndum. Hann er stórhættulegur og þetta verður taugatrekkjandi.“

Thatch kom í raun af bekknum þar sem John Hathaway meiddist. Thatch átti að berjast við annan mann á laugardag og var því búinn að æfa sig.

Sérfræðingar eru á einu máli um að Thatch sé mun sterkari en Hathaway og er mikið látið með hann rétt eins og Gunnar.

„Thatch er sterkari standandi en Hathaway og margir spá því að Hatch muni fara hratt upp metorðalistann og hann hefur verið að gera það. Hann er búinn að berjast svipað lengi og Gunni. Hann kom inn með miklum látum í UFC og hann var því settur gegn Ben Henderson sem er fjórfaldur UFC-meistari. Thatch vann fyrstu þrjár loturnar þar en síðan náði Henderson að hengja hann og klára bardagann.“

Æfði gegn stórum strákum

Það vantar ekkert upp á undirbúninginn hjá Gunnari. Hann var í sex vikur að æfa í Mexíkó og undanfarinn mánuð hefur hann verið að æfa með Conor McGregor í Las Vegas.

„Þetta er mjög góður undirbúningur og sérstaklega voru æfingabúðirnar í Mexíkó góðar þar sem hann æfði við stóra stráka eins og Cathal Pendred. Thatch er svipað stór og því gott að æfa sig. Svo æfði hann með léttari og minni mönnum í Vegas. Þetta er einn besti undirbúningur sem Gunnar hefur fengið og ég er viss um að það muni skila sér,“ segir faðirinn ákveðinn á svip, en hann var dálítið hissa er hann komst að því að Gunnar yrði á „main card“ á laugardag en það eru stærstu bardagar kvöldsins.

Verður dálítið stressaður

„Þetta er stærsta kvöld ársins og það stærsta í sögu UFC. Gunni var að koma eftir tap og því átti ég ekki von á þessu. Þetta er mikill heiður fyrir Gunna og sýnir að UFC hefur tröllatrú á honum.“

Haraldur segir það vera ljóst að það fylgi þessu aukin pressa en það þarf alls ekki að vera neikvætt að hans mati.

„Meiri athygli fylgir aukin pressa. Á móti kemur styrkur úr stuðningnum. Þessar dyr sveiflast í báðar áttir. Það á að fylgja þessu aukin pressa og ég held að Gunni muni nýta sér þetta á réttan hátt.“

Laugardagurinn er risadagur fyrir alla Nelson-fjölskylduna en hvernig mun pabbanum Haraldi líða þegar sonur hans stígur á stærsta sviðið í MGM Grand í Las Vegas?

„Ég verð örugglega dálítið stressaður. Það er alltaf mikil spenna í þessu sporti að ég tali nú ekki um þegar ástvinir manns berjast. Þessi andstæðingur er líka þannig að það er full ástæða til að vera á varðbergi. Það breytir því ekki að ég hef svakalega mikla trú á Gunna.“

Vísir er í Las Vegas og fylgir Gunnari Nelson eftir alla vikuna. Ekki missa af neinu. Like-aðu okkur á Facebook, eltu okkur á Twitter og skyggnstu bakvið tjöldin á Snapchat (sport365). Tryggðu þér svo áskrift á 365.is.