Viðskipti innlent

Viðskiptavinirnir ráða nafni staðarins

Gunnhildur Jónsdóttir skrifar
Viltu pulsu eða Pylsu? Mikið úrval af pulsum verður í boði.
Viltu pulsu eða Pylsu? Mikið úrval af pulsum verður í boði. vísir/andri marinó
Þjóðverjanum Klaus Ortlieb fannst úrvalið af pulsum hér á landi heldur aumkunarvert.

Hann ákvað að taka málin í sínar hendur og ætlar að opna pulsuveitingastað á miðvikudaginn sem mun bæði bera nafnið Pulsa og Pylsa.

„Ég veit hvað margir taka rökræðuna um hvort er réttara mikið inn á sig og ég vildi auðvitað ekki móðga neinn svo að ég ætla að leyfa viðskiptavinunum að ráða hvað þeir kalla staðinn,“ segir Klaus en hann rekur nokkur hótel í Þýskalandi, New York og einnig Hlemm Square þar sem veitingastaðurinn verður staðsettur.

Klaus hefur haldið upp á Ísland frá því hann var lítill strákur og alltaf verið vel tengdur við landið. 

„Þegar við vorum að ferðast milli Þýskalands og New York þegar ég var ungur millilentum við alltaf á Íslandi í nokkra daga og ég var fljótur að kynnast borginni og læra á hana. Síðan þá kem ég reglulega hingað og hef meðal annars umsjón með rekstrinum á Hlemmi Square. Ég vinn fyrir sjálfan mig og ég fer bara nýjar leiðir í öllu sem ég geri. Ég elska að koma með nýjar hugmyndir en þær eru aldrei hefðbundnar.“ 

Boðið verður upp á mikið úrval af pulsum sem eru allar handgerðar inni í eldhúsi. Meðal þess sem verður boðið upp á verða pulsur úr lambakjöti. 

„Allt hráefnið er ferskt og við notumst mikið við verslanir í nágrenninu. Allt brauðið verður frá Sandholti og það er pulsugerðarmaður í nágrenninu sem er að hjálpa okkur mikið. Ég hef aldrei komið nálægt pulsum áður svo að ég fékk uppskriftir frá öðrum löndum og ráðfærði mig við sérfræðinga og þetta er allt að smella frábærlega saman. Mér finnst gaman að geta opnað stað sem er alveg eftir mínu höfði og minnir mann á gamaldags þýska stofu. Andrúmsloftið er mjög heimilislegt og kósí og það mun höfða til Íslendinga.“

Pulsurnar sem verða á boðstólum eru ólíkar því sem Íslendingar þekkja. „Maturinn verður á sanngjörnu verði og það fer enginn svangur héðan út. Pulsurnar eru heil máltíð með fullt af meðlæti. Við bjóðum líka upp á forrétti og eftirrétti. Á barnum eru 100 til 120 bjórtegundir í boði og við flytjum inn vínið sjálfir sem ætti ekki að valda neinum vonbrigðum.“






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.