Mikilvægt að verja börn fyrir sólbruna

„Það er samband á milli endurtekins sólbruna hjá börnum og þess að greinast síðar á ævinni með sortuæxli. Við leggjum þess vegna áherslu á mikilvægi þess að verja börnin. Húð þeirra er þynnri en húð fullorðinna og miklu viðkvæmari,“ segir Guðlaug B. Guðjónsdóttir, framkvæmdastjóri Krabbameinsfélags Reykjavíkur.

Maí er alþjóðlegur árveknimánuður gegn sortuæxlum, að sögn Guðlaugar.

„Íslenska sólin er sterk. Það er talið að börn fái nægilegt D-vítamín séu þau með bert andlit og hendur úti í sól þrisvar í viku, 15 mínútur í senn. Við ættum að forðast að vera úti lengi í einu þegar sólin er hæst á lofti eða gera eitthvað skemmtilegt í skugganum,“ bendir hún á.

Nú greinast árlega 18 karlar og 25 konur með sortuæxli. Meðalaldur við greiningu er 58 ár hjá körlum og 49 ár hjá konum. Dánartíðni hjá 50 ára og eldri hefur tvöfaldast frá 1990 og er hækkunin meiri hjá körlum en konum. Tíðni á lengra gengnum sortuæxlum hefur aukist undanfarna áratugi hjá körlum eldri en 50 ára.

„Karlar koma seinna en konur til læknis til að láta skoða bletti. Þær fylgjast betur með sér,“ segir Guðlaug.

Nýgengi sortuæxla á Íslandi jókst gífurlega hratt á árunum 1990 til 2000 og mest hjá ungu fólki, sérstaklega ungum konum. Skýringar eru helst taldar tengjast óvenjumikilli sólbekkjanotkun á Íslandi og aukinni greiningarvirkni. Nýgengið hefur lækkað aftur.