Áfram barist um bæinn Debaltseve

Petró Porosjenkó, forseti Úkraínu, hvetur bæði Atlantshafsbandalagið og Evrópusambandið til þess að fordæma uppreisnarmenn í austanverðu landinu fyrir að virða ekki vopnahléið, sem átti að ganga í gildi um helgina.

Átök hafa haldið áfram í landinu, einkum í og kringum bæinn Debaltseve, sem uppreisnarmenn segjast að mestu hafa náð á sitt vald. Hvorki stjórnarherinn né uppreisnarmenn hafa viljað flytja þungavopn sín frá bænum, þótt um það hafi verið samið í síðustu viku.

Íbúar Debaltseve voru 25 þúsund en þeir hafa flestir forðað sér vegna átakanna. Nokkur þúsund manns eru þó enn innikróaðir í bænum og búa við alvarlegan skort á matvælum, vatni og fleiri nauðsynjum.

Uppreisnarmenn voru búnir að ná Debaltseve á sitt vald á síðasta ári en stjórnarherinn náði honum úr höndum þeirra nú í vetur.

Samkvæmt friðarsamkomulagi, sem leiðtogar Úkraínu, Rússlands, Frakklands og Þýskalands gerðu í síðustu viku og uppreisnarmenn undirrituðu síðan, eiga stríðandi fylkingar báðar að fara með herlið sitt frá átakalínunni og átti sá brottflutningur að hefjast í gær.

Síðustu dagana áður en friðarsamkomulagið var gert hörðnuðu átökin um Debaltseve verulega. Af þeim sökum reyndi Vladímír Pútín Rússlandsforseti, á leiðtogafundinum langa í Minsk í síðustu viku, að fá hina leiðtogana þrjá til að fallast á að fresta gildistöku vopnahlésins, að minnsta kosti þangað til átökunum um Debaltseve lyki.

Angela Merkel sagði því í gær að það kæmi engum á óvart að átökin um Debaltseve héldu áfram. Hún ræddi símleiðis við bæði Pútín og Porosjenkó, en hafði daginn áður rætt við Pútín og François Hollande Frakklandsforseta.

Bæði símtölin snerust að einhverju leyti um að fá Pútín til að beita uppreisnarmenn þrýstingi, en þýskir fjölmiðlar segja fátt benda til þess að Pútín hafi þokast neitt í þá áttina.

Þó var samþykkt að eftirlitsmenn frá Öryggis- og samvinnustofnun Evrópu fái aðgang að Debaltseve, eins og kveðið var á um í friðarsamkomulaginu. Uppreisnarmennirnir hafa ekki viljað hleypa þeim þangað.

Evrópusambandið hefur hótað Rússum frekari refsiaðgerðum verði ekki staðið við friðarsamkomulagið.