Fordæmisgildi Al Thani-dómsins ekkert í tilfelli Ingólfs Helgasonar

Ingólfur Helgason, fyrrverandi forstjóri Kaupþings, hafði engar heimildir til að veita eignarhaldsfélögum lán til að kaupa hlutabréf í bankanum og þá vissi hann ekki um megininntak þeirra viðskipta sem hann er ákærður fyrir í markaðsmisnotkunarmálinu svokallaða. Þetta sagði Grímur Sigurðsson, verjandi Ingólfs, í málflutningi sínum í dag.

Vísaði verjandi meðal annars í dóm Hæstaréttar í Al Thani-málinu og sagði að þau skilyrði sem þar eru tiltekin svo sakfella megi fyrir stórar sölur hlutabréfa í bankanum séu ekki til staðar hvað Ingólf Helgason varðar í því máli sem nú er ákært í.

Engin blekking, engin tilkynning, ekkert megininntak

Sagði Grímur að það yrði að vera einhvers konar blekking til staðar og í Al Thani-viðskiptunum hafi þessi blekking falist í mörgu, meðal annars því að ekki lá fyrri að fleiri en Al Thani stáðu að kaupunum.

Annað skilyrði sé að send var út opinber tilkynning vegna viðskiptanna þar sem fjárfestirinn lýsti yfir trú sinni á Kaupþingi og arðsemi félagsins.

Þá sagði Grímur þriðja skilyrðið vera að til þess að sakfella megi hvern og einn þurfi allir að hafa vitað um megininntak viðskiptanna.

Ekkert af þessu eigi við um aðkomu Ingólfs að kaupum eignarhaldsfélaganna Holt, Desulo og Mata á stórum hlutum í Kaupþingi.

„Hann vissi aldrei af megininntaki neinna þessara viðskipta, það var engin blekking í viðskiptunum og það var aldrei send út nein opinber tilkynning vegna þeirra.”

Mátti ekki veita lánin

Hvað varðar lánveitingar til félaganna þriggja vegna kaupanna sagði Grímur engin sönnunargögn liggja fyrir í málinu um að Ingólfur hafi komið að þeim.

Vísaði hann aftur til Al Thani-dómsins vegna þessa og sagði grundvallaratriði að ef sakfella ætti mann sem aðalmann í umboðssvikum þá þyrfti að liggja fyrir að viðkomandi hefði vald til að veita lánveitinguna.

„Ingólfur Helgason hafði ekki slíkt vald. Hvað varðar hlutdeild í umboðssvikum þarf að liggja fyrir sönnun um það að hver og einn ákærði hafi átt fullan þátt í að veita þau lán sem hér er ákært fyrir og sannað að það hafi verið gefin fyrirmæli um að veita lánið. Það er ekki eitt einasta sönnunargagn í málinu hvað þetta varðar fyrir Ingólf Helgason.”

Kom að því að keyra viðskiptin

Grímur sagði liggja fyrir í málinu að Ingólfur hefði komið að því sem kallað er “að keyra viðskiptin.” Hann hefði fengið upplýsingar um að það hafi verið komi á viðskiptum og komið því áfram til starfsfólks miðlunar sem keyrði viðskiptin og tilkynnti þau til Kauphallar.

Þá hafi Ingólfur jafnframt sagt að það megi vera að hann hafi komið að því að koma einhverjum viðskiptum á. Hann muni hins vegar ekki nákvæmlega hvaða viðskipti það hafi verið og hvort hann hafi komið að því að koma á einhverjum viðskiptum sem ákært sé fyrir geti hann ekkert sagt til um.

Verjandinn lagði svo að lokum mikla áherslu á það Ingólfur hefði aldrei lofað neinni fjármögnun vegna hlutabréfakaupanna enda hafði hann ekki heimild til þess. Það hafi æðstu stjórnendur bankans, Hreiðar Már Sigurðsson og Sigurður Einarsson, sagt hjá lögreglu og staðfest þann framburð sinn fyrir dómi.