Haukur Valtýsson nýr formaður UMFÍ

Haukur Valtýsson frá Akureyri var kjörinn formaður Ungmennafélags Íslands á þingi þess sem nú stendur yfir í Vík í Mýrdal. Haukur tekur við formennsku í UMFÍ af Helgu Guðrúnu Guðjónsdóttur sem gegnt hefur formennsku í átta ár. Þetta kemur fram í tilkynningu frá UMFÍ.

,,Á þessar stundu er mér efst í huga þakklæti fyrir það traust sem mér sýnt að stýra þessu stóru samtökum næstu tvö árin. Mér er falið ábyrðarfullt verkefni og mikilvægt að því sé sinnt vel. Ég reikna með að fá góða stjórn sem mun standa vel að baki formanni sem og allri hreyfingunni. Ég hlakka til starfsins og vinna með því góða fólki sem er í  hreyfingunni,“ sagði Haukur Valtýsson eftir kjörið en hann hefur verið varaformaður UMFÍ sl. fjögur ár.

Tveir einstaklingar gáfu kost á sér til formennsku en auk Hauks bauð Kristinn Óskar Grétuson sig fram. 107 þingfulltrúar tóku þátt í kjörinu og fékk Haukur 99 atkvæði.