Íbúðalánasjóður tapar milljörðum á leiðréttingunni

Íbúðalánasjóður mun tapa 600 til 900 milljónum, á ári, næstu árin vegna minni vaxtatekna í kjölfar skuldalækkana stjórnvalda á húsnæðislánum. Þetta kemur fram í skýrslu stjórnar Íbúðalánasjóðs sem birtist í ársreikningi ársins 2014.

Þar kemur einnig fram að kaupverð leiðréttingarhluta lánasafnsins sé lægra en bókfært virði lánanna. Því er bókfært 433 milljóna tapi á síðasta ári vegna kaupa á þeim hluta lánasafns sem var leiðréttur.

Skuldaaðgerðir kosta sjóðinn helming hreinna vaxtatekna

Íbúðalánasjóður gerir einnig ráð fyrir að milli 15 og 17 milljarðar verði greiddir inn á lán vegna heimildar sem einstaklingar hafa til að nýta séreignasparnað til niðurgreiðslu húsnæðislána. Þessar uppgreiðslur muni valda því að hreinar vaxtatekjur sjóðsins dragist saman um 300 til 450 milljónir til viðbótar.

Samanlagt munu því vaxtatap sjóðsins vegna skuldaúrræða ríkisstjórnarinnar nema 900 til 1350 milljónum á ári eða sem nemur um helmingi hreinna vaxtatekna Íbúðalánasjóðs.

„Framangreint tjón vegna úrræða stjórnvalda mun að óbreyttu hafa mikil áhrif á grunnafkomu sjóðsins og valda því að sjóðurinn verður hér eftir rekinn með tapi sem á endanum fellur á ríkissjóð,“ segir í skýrslu stjórnar Íbúðalánasjóðs.

Íbúðalánsjóður þarf frekara eigið fé frá ríkinu

Rekstur Íbúðalánasjóðs hefur verið erfiður undanfarin ár. Sigurður Erlingsson, forstjóri Íbúðalánasjóðs, sagði í Klinkinu í byrjun desember að fyrirséð væri að Íbúðalánasjóður þurfi frekara fjármagn frá ríkissjóði til viðbótar við þá 50 milljarða króna sem sjóðurinn hefur fengið í eiginfjárframlag eftir hrun.

Þann 19. desember fékk Íbúðalánasjóður bréf frá velferðarráðuneytinu þar sem sagði að það sé skilningur Eygló Harðardóttur, félagsmálaráðherra og Bjarna Benediktssonar fjármálaráðherra að Íbúðalánasjóði verði bætt það tjón sem skuldaaðgerðir ríkisstjórnarinnar kunni að valda sjóðnum. Ekki liggi þó fyrir með hvaða hætti það verði gert.

Óvissa um framtíð sjóðsins

Þrátt fyrir erfiða stöðu sjóðsins þá skilaði Íbúðalánasjóður 3,2 milljarða hagnaði árið 2014 en sjóðruinn tapaði 4,3 milljörðum árið 2013. Eigið fé sjóðsins jókst því úr 3,4 prósentum í 4,5 prósent á árinu. Eigið féð þykir enn lágt en langtímamarkmið sjóðsins er að því að eiginfjárhlutfall sjóðsins verði yfir 5 prósent.

Óvissa ríkir um framtíð sjóðsins en tillögur að nýrri framtíðarskipan húsnæðismála hafa verið í vinnslu hjá félagsmálaráðherra um talsverða hríð.