NBA: Westbrook með 54 stig í nótt | Myndbönd

Russell Westbrook hefur aldrei skorað fleiri stig í einum leik í NBA-deildinni en að hann gerði í nótt en skapið fór með hann í lokin og Oklahoma City Thunder tapaði naumlega á móti Indiana Pacers.

Russell Westbrook skoraði 54 stig í leiknum en fékk á sig örlagaríka tæknivillu á lokasprettinum. Thunder-liðið tapaði þarna í fimmta sinn í sex leikjum og er enn þá við hlið New Orleans Pelicans í baráttunni um áttunda og síðasta sætið inn í úrslitakeppnina.

Westbrook var einnig með níu fráköst og átta stoðsendingar en hann hitti úr 21 af 43 skotum utan af velli, setti niður 5 af 15 þriggja stiga skotum sínum og nýtti 7 af 11 vítum. Westbrook var kominn með 22 stig og 4 stoðsendingar eftir fyrsta leikhlutann.

James Harden og félagar í Houston Rockets hjálpuðu aðeins Oklahoma City Thunder með því að vionna 121-114 sigur á New Orleans Pelican þar sem Harden skoraði 30 stig. Þetta var 35. leikurinn á tímabilinu þar sem James Harden fer fyrir 30 stigin.

Tim Duncan var með 22 stig og 10 fráköst þegar San Antonio Spurs fagnaði sínum ellefta sigri í röð með því að vinna 107-91 sigur á Phoenix Suns en með þessum sigri er Spurs komið með hálfsleiks forskot á Memphis í baráttunni um sigurinn í deildinni.

Úrslit úr öllum leikjum í NBA-deildinni í nótt:

Indiana Pacers - Oklahoma City Thunder     116-104     

Washington Wizards - Atlanta Hawks     108-99         

Houston Rockets - New Orleans Pelicans     121-114     

San Antonio Spurs - Phoenix Suns     107-91         

LA Lakers - Dallas Mavericks     106-120