Kosið til þings í Póllandi í dag

Þingkosningar fara fram í Póllandi í dag. Skoðanakannanir gefa til kynna að íhaldsflokkurinn Lög og réttur undir forystu Jaroslaw Kaczynski muni sigra kosningarnar en sá flokkur hefur verið í stjórnarandstöðu undanfarin átta ár.

Borgaraflokkurinn hefur verið við völd síðustu fjögur ár en sitjandi forsætisráðherra er Ewa Kopacz. Flokkurinn hefur átt undir högg að sækja í komandi kosningum þrátt fyrir að tölur bendi til þess að stöðugleiki hafi aukist í efnahagsmálum í valdatíð hennar.

Skoðanakannanir benda til þess að íhaldsflokkurinn Lög og réttur fái mest fylgi en þær bjartsýnustu spá flokknum hreinum meirihluta á þinginu. Beata Szydlo er forsætisráðherraefni flokksins en hún var meðal annars kosningarstjóri forseta Póllands, Andrzejs Duda, sem tók við embættinu þann 6. ágúst fyrr á þessu ári.

Flóttamannavandinn hefur mikið verið ræddur í aðdraganda kosninganna en núverandi ríkisstjórn hefur samþykkt að taka á móti 7.000 innflytjendum. Jaroslaw Kaczynski formaður Laga og réttar hefur verið gagnrýndur fyrir ummæli sín um að fara þurfi varlega í móttöku innflytjenda þar sem þeir gætu borið með sér sjúkdóma og sníkjudýr.