Þrjú um tvítugt í tveggja vikna einangrun

Ungmennin þrjú sem lögregla á Suðurlandi handtók þann 8. október síðastliðinn vegna gruns um fjölda innbrota í tveggja daga leiðangri um Suðurlandið hafa verið úrskurðuð í gæsluvarðhald og einangrun til 23. október næstkomandi. Verjendur allra þriggja mótmæltu úrskurði Héraðsdómi Suðurlands og áfrýjuðu honum. Hæstiréttur hefur hins vegar staðfest gæsluvarðhaldið og einangrunina.

Mennirnir eru nítján og tuttugu ára og voru handteknir á á Kirkjubæjarklaustri á stolnum pallbíl sem talið er að hafi verið notaður til að flytja þýfið í sumarbústað. Mikið magn þýfis fannst í bílnum og sömuleiðis í sumarbústað, skammt frá Kirkjubæjarklausti þar sem þriðji aðilinn, nítján ára stúlka, fannst sofandi.

Þremenningarnir eru grunaðir um að hafa stolið bílnum í Reykjavík og lagt af stað þann 7. október í innbrotaleiðangur um Suðurland þar sem meðal annars var komið við í apótekinu á Hellu, Beinaverksmiðjunni í Flóanum fyrir austan Selfoss, hóteli í Drangshlíð, sjoppu við Landvegamót og sumarbústað við Kirkjubæjarklaustur.

Enn berast ábendingar

Ekki reyndist unnt að yfirheyra þremenningana daginn sem þau voru handtekin þar sem þau voru í vímu. Lögregla færir rök fyrir því í gæsluvarðhalds- og einangrunarkröfu sinni að rannsókn sé á frumstigi.

Innbrotin hafi mörg hver verið í sumarbústaði og líkur séu á að um fleiri innbrot sé að ræða. Eigendur bústaðanna hafi hreinlega ekki áttað sig á þeim enn þá. Lögreglu berist enn ábendingar um innbrot. Telur lögregla að þremenningarnir geti skotið undan þýfi, samræmt framburð sinn og þannig torveldað rannsókninni.

Öll eiga sakaferil að baki og hefur annar mannanna rofið skilorð með brotum sínum. Þykir ljóst að hann fái óskilorðsbundinn dóm verði hann fundinn sekur. Verjendur kröfðust þess allir að gæsluvarðhaldsúrskurðurinn yrði felldur úr gildi en til vara að gæsluvarðhaldi yrði markaður skemmri tími.

Þurfa þau öll að sæta einangrun til 23. október.