Ógnaði strák með sprautunál og stal af honum síma

Héraðsdómur Reykjaness hefur dæmt 18 ára pilt í 9 mánaða skilorðsbundið fangelsi fyrir þjófnað, rán, fíkniefnalagabrot og umferðarlagabrot.

Pilturinn var ákærður fyrir að hafa í júlí 2014 ógnað stráki með sprautunál og rænt af honum iPhone 5 snjallsíma þar sem þeir voru í Mjóddinni. Hótaði pilturinn að stinga strákinn með sprautunálinni og smita hann þannig af HIV ef hann afhenti honum ekki símann.

Fyrir dómi neitaði pilturinn sök. Sagðist hann hafa hafa haldið að umræddur strákur skuldaði sér pening. Hann hafi því tekið símann af honum upp í meinta skuld en síðan hafi hann áttað sig á því, þegar síminn hringdi, að hann hefði farið mannavillt. Sagðist pilturinn hafa sagt við þann sem var í símanum að hann myndi skilja símann eftir sem hann sagðist hafa gert, við Breiðholtsbrautina við Mjódd. Þá kvaðst pilturinn ekki hafa ógnað stráknum með sprautunál.

„Ef þú kúkar svona á þig yfir 1 sprautunál“

Strákurinn sem átti símann kom einnig fyrir dóm. Lýsti hann því fyrir dómi að pilturinn sem ákærður var í málinu hefði komið að máli og spurt „hovrt hann mætti hringja úr síma hans og hvort hann ætti Ritalin.“ Strákurinn neitaði því en sagði fyrir dómi að þá hafi pilturinn tekið upp sprautunál og hótað að stinga hann nálinni og smita hann þannig af HIV. Strákurinn kvaðst hafa verið mjög hræddur en pilturinn hafi tekið af honum símann.

Pilturinn sendi stráknum síðar Facebook-skilaboð vegna málsins og kom aftur fyrir dóm vegna þeirra. Í skilaboðunum sagði hann meðal annars: „Og ef þú kúkar svona á þig yfir 1 sprautunál þá væri ég til í að sjá svipinn á þér þegar...“ Fyrir dómi var pilturinn spurður að því hvort hann væri þarna að viðurkenna að hann hefði verið með sprautunál en hann neitaði því. Sagði hann að tilgangur Facebook-skilaboðanna hafi verið að fá strákinn til að draga kæruna til baka „þar sem hann hafi ekki hótað brotaþola með sprautunál.

Önnur brot piltsins smávægileg

Dómurinn taldi hins vegar sannað, meðal annars með vísan í Facebook-skilaboðin, að pilturinn hafi verið með sprautunál og hótað að stinga strákinn með henni. Þá var jafnframt talið sannað að hann hefði rænt piltinn.

Önnur brot sem pilturinn var ákærður fyrir taldi dómurinn smávægileg auk þess sem það var virt honum til málsbóta að hann játaði skýlaust sök við þeim öllum:

„Ákærði virðist hafa áttað sig á misgjörðum sínum og vísaði meðal annars lögreglu á ránsfenginn. Þá kom fram í málinu að ákærði sé að reyna að hverfa frá þeirra braut sem hann stefndi í og hefur meðal annars verið lögð fram staðfesting þess efnis að ákærði sé í námi við Námsflokka Reykjavíkur,“ eins og segir í dóminum. Hæfileg refsing hans var því metin, eins og áður segir, 9 mánaða skilorðsbundið fangelsi.