Júlía fordæmir þá sem leita uppi kynlífsmyndbandið

Júlía Birgisdóttir kom fram í viðtali í Kastljósi gærkvöldsins og greindi frá því að maður sem hún var áður í sambandi við hafi tekið upp myndband af þeim í ástaratlotum, að henni forspurðri og dreift á netið. Það mun nú vera komið á fjölda erlendra klámsíðna.

Viðtalið vakti mikla athygli og á Facebooksíðu Júlíu hrannast inn stuðningsyfirlýsingar, og þykir hún hafa sýnt mikinn kjark með því að stíga fram með sín mál.



Ekki hefndarklám

Júlía hefur kært viðkomandi og tók hún meðal annars fram í viðtalinu að hún telur af og frá að flokka þennan gjörning sem hefndarklám svokallað heldur stafrænt kynferðisbrot. Það gerir og lögmaður hennar Gísli Tryggvason.

Júlía skrifar í kjölfar Kastljósþáttarins pistil þar sem hún svarar þeirri spurningu, sem hún telur brenna á mörgum, sem er sú hvers vegna hún hafi komið fram undir nafni og mynd.

„Fyrst vil ég segja að ENGINN vill vera þekktur fyrir þetta og höfum það alveg á hreinu að það er ekki athygli sem ég sækist eftir. En þegar eitthvað er komið á netið þá fer það aldrei og þetta myndband mun elta mig út lífið,“ segir Júlía og segir að hún hafi átt tvo kosti í stöðunni:

Vildi ekki lifa í ótta

„Annað hvort að vera hrædd og fela mig; lifa í stöðugum ótta að einhver myndi finna myndbandið og nota það gegn mér. Eða ég gat komið fram á eigin forsendum og ákveðið að enginn fær að hræða mig með þessu.“

Júlía vonar að þetta geti orðið til að hjálpa þeim sem eru í svipuðum sporum og hún, en pistlinum lýkur hún með því að fordæma þá sem vilja leita þetta myndband uppi:

„Til þeirra sem vilja finna myndbandið og horfa á segi ég: ef þið finnið video-ið og horfið, skulið þið gera ykkur grein fyrir því að þetta er alvarlegt kynferðisbrot gegn mér sem þið eruð að horfa á! Þið eruð ekkert betri en sá sem tók það upp og dreifði því. Skömmin er ekki mín! Hún er ykkar!“

Helga Arnar og Kastljósið fjölluðu í kvöld um kærumál sem ég er með í gangi sem ég vil kalla stafrænt kynferðisbrot. (Þ...

Posted by Júlía Birgis on 15. desember 2015