Mjólk og mjólkurafurðir hækka í verði um 3,58 prósent

Verðlagsnefnd búvara hefur tekið samhljóða ákvörðun um að heildsöluverð á mjólk og mjólkurafurðum, sem nefndin verðleggur, hækki um 3,58 prósent 1. ágúst næstkomandi. Smjör hækkar hins vegar um 11,6 prósent.

Í frétt á vef atvinnuvega- og nýsköpunarráðuneytisins segir að afurðastöðvaverð til bænda hækki um 1,47 krónur á lítra mjólkur, úr 82,92 krónur í 84,39. „Þá hækkar vinnslu- og dreifingarkostnaður mjólkur um 4,27 kr. Samanlögð hækkun heildsöluverðs er því 5,74 kr. á hvern lítra mjólkur.

Breytingin er til komin vegna kostnaðarhækkana sl. tveggja ára við framleiðslu og vinnslu mjólkur, en síðasta verðbreyting fór fram 1. október 2013,“ segir í frétt ráðuneytisins.