Stundum leiðinlegt á æfingum hjá Lars

Kolbeinn Sigþórsson, framherji íslenska landsliðsins, viðurkenndi það á blaðamannfundi fyrir leikinn við Letta á morgun að það sé stundum leiðinlegt á æfingum íslenska landsliðsins þar sem Lars Lagerbäck og Heimir Hallgrímsson leggja áherslu á það að skipuleggja íslenska liðið sem best.

„Ég reyni að skipuleggja liðið mjög vel og af þeim sökum verða æfingarnar stundum svolítið leiðinlegar hjá okkur þar sem er mikið um endurtekningar. Strákarnir eru sterkir andlega og gera alltaf sitt besta þannig að þetta hefur verið auðvelt. Karakter íslensku leikmannanna er sérstakur," sagði Lars Lagerbäck.

Landsliðsþjálfarinn hvatti síðan Kolbein Sigþórsson til að gefa heiðarlegt svar þegar hann var spurður út í leiðinlegar æfingar Svíans.

„Þótt að við séum komnir inn á þetta lokamót þá er Lars jafníhaldssamur og hann hefur verið hingað til. Hann vill halda áfram á sömu braut og gera þessar æfingar sem eru kannski ekki þær skemmtilegustu. Þær virka og það hefur sýnt sig að við erum vel skipulagðir og það er erfitt að spila á móti okkur," sagði Kolbeinn.

„Hann er kannski ekki alltaf með allra skemmtilegustu æfingarnar," sagði Kolbeinn og Lars Lagerbäck grípur þá fram í fyrir honum:  „Þú mátt alveg segja sannleikann," sagði Lars og fékk að launum hlátur frá þeim blaðamönnum sem voru mættir á fundinn.

„Það er bara mikilvægt fyrir okkur að fara í gegnum þessar æfingar sem eru ekki skemmtilegar. Við getum ekkert verið að væla yfir þessu og yfir því að við fáum ekki alltaf að fara í reit eða spila. Það er mikilvægara að stilla saman liðið og fara yfir varnartaktíkina og sóknartaktíkina hjá okkur. Það hefur verið okkar plan undanfarin ár að gera þetta svona. Af hverju ættum við að hætta því núna?," sagði Kolbeinn.

Lars Lagerbäck vildi líka bæta aðeins við þetta.  „Það er auðvelt að vera þjálfari þegar úrslitin falla með þér. Á meðan þú ert að vinna leikina þá eru leikmennirnir almennt ánægðir. Það er erfitt að vera neikvæður þegar liðið er að vinna. Við sjáum til hvað gerist þegar liðið byrjar að tapa leikjum en við ætlum ekki að fara byrja á því núna," sagði Lagerbäck og Kolbeinn tók strax undir það.