Gripin á stolnum bíl á stolnum númerum á leið til Reykjavíkur

Lögreglan á Suðurlandi glímdi við margskonar verkefni í liðinni viku. Flugslysaæfing fór fram á Höfn, ölvaður gestur á veitingastað sló til lögreglumanna og kona var handtekinn á leið til Reykjavíkur á stolnum bíl á stolnum skráningarnúmerum.

Bifreiðareigandi á Selfossi kom á lögreglustöðina þar í bæ í sl. viku og sagði að skráningarnúmerum hefði verið stolið af bifreið sinni. Hann sneri aftur skömmu síðar og taldi sig hafa séð skráningarnúmerin á svartri BMW-bifreið á leið norður yfir Ölfusábrú.

Lögreglumenn hófu leit að bifreiðinni og fundu hana við Kögunarhól. Kona sem reyndist undir áhrifum fíkniefna ók bifreiðinni og var hún svipt ökuréttindum. Einnig kom í ljós að bifreiðinni hafði verið stolið í Reykjavík.

Lögreglumenn á Höfn í Hornafirði voru kallaðir út á veitingastað í bænum á laugardagskvöld vegna manns sem svaf þar ölvunarsvefni. Eitthvað fór það í taugarnar á honum þegar lögreglumenn vöktu hann, veittist hann að þeim og tókst að slá í andlit eins lögreglumann. Maðurinn var handtekinn og færður í fangageymslu.

Tvo beinbrot komu á borð lögreglu í vikunni. Stúlka fótbrotnaði við Stafafell í Lóni er henni skrikaði fótur. Var hún flutt með með flugi til Reykjavíkur þar sem hún hlaut aðhlynningu. Á föstudaginn ökklabrotnaði kona við Jökulsárlón þegar hún hnaut um stein.

Einnig fór fram um helgina umfangsmikil flugslysaæfing á Hornafjarðarflugvelli þar sem æfð voru viðbrögð við brotlendingu farþegaflugvélar með 21 farþega innanborðs. Almannadeild ríkislögreglustjóra setti upp æfinguna sem þótti takast vel.

Helstu verkefni lögreglunnar á Suðurlandi vikuna 20. til 26. október 2015. Um helgina fór fram flugslysaæfing á...

Posted by Lögreglan á Suðurlandi on Monday, 26 October 2015