Fín veðurspá fyrir vatnaveiðina um helgina

Núna á stærstu ferðahelgi ársins eru eflaust margir sem hafa pakkað veiðistöng og tilheyrandi búnaði með í bílinn fyrir helgina.

Veðurspáin er veiðimönnum ,sem ætla að kíkja í vötnin um land allt, mjög hagstæð og það ættu allir að geta fundið sér vatn við hæfi. Á sunnudaginn er spáð hægviðri og frábæru veðri t.d. fyrir Þingvallavatn og Úlfljótsvatn en það síðarnefnda hefur verið að koma sérstaklega sterkt inn núna seinnipartinn í júlí. Hraunsfjörður og Hópið eru líka búin að gefa frábæra veiði á sólardögum í sumar og núna er einmitt að hefjast langbesti tíminn í sjóbleikjuna.

Á þessum tíma koma gjarnan stærstu göngurnar í árnar og þá geta neðri svæðin í t.d. Miðfjarðará, Víðidalsá, Vatnsdalsá og Hrútafjarðará fylst af flottri sjóbleikju. Þegar veðrið er skoðað fram á mánudag er útlit fyrir gott veiðiveður um allt land. Það á að vera þurrt meira og minna alla helgina með hlýnandi veðri sem eru kjörskilyrði fyrir vötnin á heiðunum. Arnarvatnsheiði, Skagaheiði og Melrakkaslétta gætu því verið málið um helgina. Annara er þetta frekar þannig að það er erfitt að velja hvert það á að vera þegar það spáin svona góðri helgi.

Endilega deilið með okkur helgarveiðinni ykkar og sendið okkur póst á kalli@365.is með veiðimyndum og smá veiðisögu. Góða helgi og góða veiði.