Bjuggust við gagnrýni vegna hvalabjórsins

Einn af eigendum brugghússins Steðja segir að viðbúið hafi verið að Hvalur 2, nýr þorrabjór brugghússins, yrði gagnrýndu. Hann segir þó áhugann vera mikinn. „Við áttum alveg von á einhverri umfjöllun og einhverri gagnrýni líka. Við vorum alveg búin að búa okkur undir það. Við bjuggumst alveg við því,“ segir Dagbjartur Arilíusarson.

 

„Öll þessi umfjöllun erlendis hefur orðið til þess að við fáum gríðarlega margar fyrirspurnir erlendis frá. Við gætum rauninni selt alla bjórana bara út ef við vildum til einstaklinga,“ segir hann en bætir við að bjórinn verði sendur meira og minna allur í Vínbúðina. „Svo tökum við bara ákvörðun í framhaldi af því hvort við höldum áfram með þetta eða ekki.“

Sjá einnig: „Hugsandi fólk myndi ekki drekka þennan bjór“

Stefnir þá í að Hvalur 2 verði í boði allan ársins hring? „Það er alveg möguleiki ef að eftirspurnin verður eins og litur út fyrir þá þurfum við allavega að hugsa það hvað við gerum,“ segir Dagbjartur.

Til greina kemur að horfa meira á erlendan markað en áður. „Við erum í þannig stöðu í dag að við þurfum að hugsa um alla þá markaði sem við getum og þess vegna þurfum við að velta því vandlega fyrir okkur hvort við eigum að halda þessu áfram eða ekki,“ segir hann. „Það byggir svolítið á því hvort það sé stöðugur markaður erlendis fyrir þennan bjór en áhuginn er rosalega mikill og við höfum fengið svakalega mikið af pöntunum á netinu og víðar.“

Dagbjartur segir að hvalabjórinn sé gerður í takt við þorrann og ekki bara í kynningarskyni. „Þetta er fyrst og fremst fyrir íslenska þorrann og ég hef sagt það í erlendum fjölmiðlum, og  notað tækifærið kynnt um leið íslenska þorrann fyrir fólki,“ segir hann.

Dagbjartur er sjálfur mikill þorramaður og borðar allt sem þá er boðið upp á. „Ég er fæddur og uppalinn í sveit og ég er mikill þorramaður, borða allt sem á borð kemur,“ segir hann.