Ríflega þrisvar sinnum fleiri ofbeldiskonur leita meðferðar

Átakið Karlar til ábyrgðar hefur boðið upp á meðferð fyrir gerendur heimilisofbeldis undanfarin ár. Fyrir tæpum tveimur árum var byrjað að bjóða konum upp á meðferð. Tvær konur höfðu leitað sér meðferðar fyrir rúmu ári. Í dag hafa níu konur leitað sér meðferðar.

Vegna fleiri kvenna sem leita sér aðstoðar mun nafni meðferðar vera breytt í Heimilisfrið á næstu dögum. Aðstandendur meðferðarinnar segja nafnabreytinguna endurspegla breytta umræðu í samfélaginu.

Samt sem áður eru mun fleiri karlmenn sem leita aðstoðar og þeim fjölgar ár frá ári. 42 prósentum fleiri karlmenn hafa sótt meðferð á fyrstu sex mánuðum þessa árs en í fyrra og frá byrjun hafa 450 karlar leitað sér aðstoðar. Andrés Ragnarsson, sálfræðingur hjá Körlum til ábyrgðar, segir skömm og litla umræðu um ofbeldi gegn körlum valda því að það fái frekar að þrífast í skjóli þagnar.

„Það er gott að karlmenn stígi fram og segi frá sinni reynslu. Það opnar umræðuna og brýtur niður staðalmyndir. Aukin umræða um konur sem beita ofbeldi skilar sér vonandi í því að fleiri konur leita sér hjálpar hjá okkur,“ segir Andrés.

Andrés segir ekki mikinn mun á hvernig ofbeldisbeiting er hjá kynjunum en það sé munur á afleiðingum ofbeldisins.

„Almennt er það svo að afleiðingar ofbeldis karla gegn konum eru alvarlegri. Þá er ég ekki að gera lítið úr afleiðingum ofbeldis sem konur beita, en í krafti aflsmunar eru konurnar almennt í meiri hættu.“

Andrés segir ofbeldið geta verið stjórntæki en það sé ekki síður vanmáttur. „Þá kunna þau ekki að bregðast við ögrandi aðstæðum – eru fátæk á því sviði. Það koma upp ögrandi aðstæður, þeim finnst þeim ógnað og kunna jafnvel aðeins að bregðast við á einn hátt – eða eins og haft var fyrir þeim sem börnum. Hlutverk okkar er að kenna öðruvísi viðbrögð.“ 

Karlar óttast að missa börnin

Drekaslóð býður öllum fórnarlömbum ofbeldis ráðgjöf. Þangað leita meðal annars karlar sem verða fyrir heimilisofbeldi. „Karlmenn tala mikið um andlegt ofbeldi en það er sannarlega líka líkamlegt ofbeldi. Konur beita til að mynda frekar áhöldum,“ segir Thelma Ásdísardóttir ráðgjafi.

Thelma segir tvennt koma til sem veldur því að færri karlar leiti sér aðstoðar. Konur eigi til að beita börnunum fyrir sig og hóta því að ef þeir fara þá fái þeir ekki að hitta börnin. „Og það er nú þannig að réttur kvenna í forræðismálum er mjög sterkur.“ Í öðru lagi sé eins og karlar geri sér síður grein fyrir að þeir séu beittir ofbeldi. „Það er eðlilegt út af skorti á umræðu og skömmin getur verið mikil. Margir menn hringja hingað til þess að fá staðfestingu á að það sé verið að beita þá ofbeldi og fá svo ráðgjöf í kjölfarið.“