Fræða um ofbeldi en hafa ekki fagþekkingu

Aflið, samtök gegn kynferðis- og heimilisofbeldi á Norðurlandi, hafa í nóvembermánuði farið í alla grunnskóla Akureyrar með fyrirlestur fyrir 7. og 9. bekk. Engin fagþekking á málaflokknum er innan samtakanna.

Ingibjörg Þórðardóttir, ráðgjafi hjá Aflinu, segir samtökin fara inn í skólana til að ræða um kynferðislegt ofbeldi og heimilisofbeldi. Annars vegar er rætt við 7. og hins vegar 9. bekk. Starfsmaður frá skólanum er einnig viðstaddur fyrirlestrana.

„Við erum ekki menntaðir kennarar en við sem sinnum þessari fræðslu höfum starfað lengi í greininni sem ráðgjafar,“ segir Ingibjörg. „Þessi fræðsla er ekki greidd af skólum bæjarins heldur fær Akureyrarkaupstaður þessa þjónustu frá okkur þar sem hann styrkir samtökin árlega.“

Þann 27. október var málið tekið upp á fundi með skólastjórum Akureyrarbæjar. Í umræðum á fundinum var lögð áhersla á að fræðsla sem þessi væri faglegum grundvelli.

Soffía Vagnsdóttir, fræðslustjóri Akureyrarbæjar, segir þetta hafa verið rætt nokkuð ítarlega og ráðgert að skólastjórnendur sjálfir myndu taka ákvörðun um framhaldið.

Soffía segir þessa fræðslu mikilvæga og eiga brýnt erindi til nemenda í grunnskólum þar sem um samfélagsmein sé að ræða. Það sé hins vegar mjög mikilvægt að fagþekking sé á bak við en ekki aðeins reynsla af ofbeldi.

„Við erum sammála um það að fræðslan er þörf en spurningin er bara hver eigi að sinna henni. Einnig erum við með skólahjúkrunarfræðinga sem sinna fræðslu í skólunum okkar og koma þar að og því ættum við í meiri mæli að vera með heilbrigðisstarfsfólk sem sinnir erindum sem þessum. Þetta er viðkvæmt málefni og það skiptir miklu máli hvernig við nálgumst þessa fræðslu,“ segir Soffía.

Logi Einarsson, formaður skólanefndar Akureyrarbæjar, segist ekki vera innviklaður í daglegt starf grunnskólanna. „Það er mikilvægt að kennsla barnanna okkar sem og fræðsla til þeirra sé sett fram af fagfólki og að faglegar kröfur séu gerðar til þeirra sem sinna kennslu,“ segir Logi.