Mamma sektar fyrir tapaða bolta

Stephen Curry er einn heitasti leikmaður NBA-deildarinnar og mamma hans heldur honum á tánum.

Curry hefur farið á kostum með liði Golden State Warriors í vetur. Ef hann stendur sig ekki þarf hann að blæða á mömmu gömlu.

Mamman gerði samning við strákinn fyrir nokkrum árum. Hann gengur út á að ef hann tapar þrem boltum í leik þá skuldar hann mömmu sinni 13 þúsund krónur fyrir hvern tapaðan bolta.

Mamman, Sonya, heldur utan um bókhaldið og í lok hvers tímabils sendir hún honum lista yfir hluti sem hann á að kaupa handa henni fyrir sektirnar.

„Þessi samningur heldur mér á tánum í hverjum leik. Ég veit hún sendir mér sms og gerir grín ef það koma háar sektir," sagði Curry léttur.

Hann tapaði boltanum 294 sinnum í fyrra og skuldaði mömmu sinni því 800 þúsund krónur.

Curry gengur betur að halda boltanum í vetur og sektin stendur aðeins í 80 þúsund í dag.