Heimsmeistarinn fór í vörn gagnvart fréttamönnum

Magnus Carlsen heimsmeistari í skák lék sinn fyrsta leik á evrópumóti landsliða í Laugardalshöll í dag. Hannes Hlífar Stefánsson stórmeistari segir að gaman yrði ef íslenska sveitin fengi tækifæri til að tefla við þá norsku.

Fyrsta umferð Evrópumóts landsliða í skák var tefld á föstudag en þetta er sterkasta skákmót í Evrópu á þessu ári. Margir sterkir skákmenn taka þátt í mótinu en enginn þeirra þó eins sterkur og frægur og heimsmeistarinn Magnus Carlsen sem telfdi í fyrsta skipti á mótinu í dag.

Fréttamenn Stöðvar 2 og Ríkissjónvarpsins gengu að heimsmeistaranum í von um smá viðtal áður en hann settist að tafli en fékk snubbótt svör.

„Jeg beklager, har ikke tvo minute,“ sagði Magnús einbeittur og strunsaði inn í Laugardalshöllina.

Nei heimsmeistarinn var ekki tilbúin í viðtal við auðmjúka íslenska fréttamenn og strunsaði beint inn í skáksalinn þar sem hann vakti óskipta athygli annarra skákmanna og áhorfenda, sem sumir hverjir fengu eiginhandaráritun hjá stjörnunni. Hannes Hlífar Stefánsson stórmeistari hefur telft við Magnús.

„Jú jú, það væri mjög gaman að tefla við hann aftur. Hann var mjög ungur þegar ég tefldi við hann, bara fjórtan, fimmtán ára,“ segir Hannes Hlífar.

Hvernig fóru þær skákir?

„Ég tapaði fyrir honum síðast en ég vann hann þegar hann var fimmtán ára. Það var einmitt hér í reykjavík 2004,“ segir Hannes Hlífar. Hannes Hlífar telur að til séu skákmenn sem geti ógnað veldi Magnúsar. „Kannski ekki í Evrópu en aðallega í Kína. Það er kannski meiri ógn þar og í Asíu en hér í Evrópu,“ segir Hannes Hlífar.

Aðalsveit Íslands telfdi við lið Þjóðverja í dag og gamla kempan Friðrik Ólafsson telfdi með gullaldarliði Íslands gegn Tyrklandi. Friðrik var hinn rólegasti eftir fyrsta leik sinn og gekk spekingslega um salinn á meðan mótherji hans frá Tyrklandi svitnaði yfir næsta leik fyrrverandi forseta FIDE.

Íslenska sveitin gerði jafntefli á öllum borðum á móti Þjóðverjum en gullaldarliðið hafði ekki lokið öllum sínum skákum. Kvennalandsliðið gerði 2-2 jafntefli við Belga.