Fleiri Íslandsauglýsingar: Dyravörðurinn á Kaffibarnum fer í sjósund og borðar Arla-skyr

Arla hefur sett í loftið sex nýjar auglýsingar í kjölfar auglýsingarinnar sem Vísir hefur áður fjallað um. Þær má sjá hér að neðan.

Mjólkursamsalan gagnrýndi þá harðlega það sem þeir töldu ímyndarstuld í ljósi þess að skyrið sem Arla hefur hafið sölu á í Bretlandi er ekki framleitt hér á landi og hefur engin tengsl við Ísland.

„Við getum ekkert verið fúl yfir því að þeir séu að selja skyr í Bretlandi, við munum keppa við þá og byrja sjálfir í vor. En menn eru að nýta sér jákvæða ímynd Íslands sem er í dag víða og manni finnst pínulítið að stela henni,“ sagði Jón Axel Pétursson, framkvæmdastjóri sölu- og markaðssviðs Mjólkursamsölunnar, í Reykjavík Síðdegis á Bylgjunni fyrir tæpri viku um fyrstu auglýsinguna. 

Sjá einnig: Ísland í auglýsingu í Bretlandi: Segir púkalegt af Arla að stela íslenskri ímynd í hagnaðarskyni



Auglýsingarnar sex sem Arla hefur birt á YouTube eiga það allar sameiginlegt að í þeim segja Íslendingar frá hversdegi sínum og hvernig skyr hjálpar til í þeirri hörðu veðráttu sem litar daglegt líf Íslendinga.

Í einni auglýsingunni sést dyravörður á Kaffibarnum lýsa daglegu lífi sínu. „Ég er frá Íslandi, þess vegna syndi ég í sjónum og borða skyr,“ segir dyravörðurinn sem kallaður er Jói B. „Ég vinn langar vaktir og stundum er fimmtán stiga frost. Sem er ekkert vandamál. Svo lengi sem ég klára fyrir morgunskyrið og sjósundið. Þá er ég sáttur.“

Í myndbandinu sést hann standa fyrir utan Kaffibarinn í snjóbyl, fara í sjósund og lýsa því hversu próteinríkt það er. Dyravörðurinn kemur svo aftur fyrir í nokkrum innslögum sem eru undir hálf mínúta að lengd þar sem fram kemur að skyrið sé hægt að borða á hvaða tíma dags sem er og að það sé fitusnautt.

Önnur auglýsingin sýnir hjólreiðakonu sem hyggst hjóla hringinn í kringum landið. Hún er leikin af sjónvarpskonunni geðþekku Kolbrúnu Björnsdóttur. Konan sést hjóla yfir fjöll og firnindi í íslenskri veðráttu. Nokkur innslög birtust að auki í kjölfar þeirrar auglýsingar þar sem hjólreiðakonan segir frá því að allir ættliðir neyti skyrs og að stundum þegar hún hjóli á Íslandi líði henni eins og hún sé bláber í stórri skál af skyri.

Það er stundum -15 gráðu frost á Íslandi og dyravörðurinn þarf að vinna úti en hann segir það í lagi ef hann fær skyrið sitt á morgnana: Hér er húmorinn í fyrirrúmi hjá dyraverðinum sem vill fá áhorfendur til að treysta sér með það að skyr sé í raun fitusnautt: Hér sést svo hjólreiðakonan hjóla um fjöll og firnindi: