Papco dæmt fyrir ólögmæta uppsögn

Héraðsdómur Reykjavíkur dæmdi í gær Papco hf. til að greiða fyrrverandi starfsmanni fyrirtækisins tæpar 2 milljónir króna vegna ólögmætrar uppsagnar í ágúst 2014. Um er að ræða laun sem maðurinn átti inni hjá Papco vegna uppsagnarinnar auk desemberuppbótar, orlofs og orlofsuppbótar.

Fram kemur í dómnum að manninum hafi verið sagt upp fyrirvaralaust en í uppsagnarbréfi var ástæða uppsagnarinnar sögð brot á trúnaðarskyldu. Í greinargerð Papco voru talin upp nokkur atvik sem urðu til þess að manninum var sagt upp.



Gaf vörur til að koma á viðskiptasamböndum

Þar á meðal var sala og afhending til veitingastaðarins Obladí án þess að reikningur hefði verið gerður, þá átti maðurinn að hafa gefið vörur nokkrum sinnum til fyrirtækja, meðal annars pizzukassa til pizzustaðar, auk þess sem Papco taldi að hann hygðist stofna sitt eigið fyrirtæki í samkeppni við Papco.

Að mati dómsins gáfu ofangreind atvik Papco ekki heimild til að segja manninum fyrirvaralaust upp störfum. Hann hafi meðal annars skýrt það fyrir dómi að hann gefið vörur, þar á meðal pizzukassana, til að koma á viðskiptasamböndum fyrir hönd Papco en fyrirtækið hrakti ekki þessar skýringar fyrir dómi.

Þá metur dómurinn það sem svo að fyrirtækið hafi dregið of miklar ályktanir þegar talið var að starfsmaðurinn hygðist stofna sitt eigið fyrirtæki í samkeppni við Papco. Það hefði því ekki gefið Papco heimild til að reka manninn.

Papco var því dæmt til að greiða manninum þau laun sem hann átti inni hjá fyrirtækinu í samræmi við uppsagnarfrest hans en miskabótakröfu hans var hafnað. Dóm héraðsdóms má lesa í heild sinni hér.