Stigi notaður til að komast á bak stærsta hesti landsins

Það dugir ekkert annað en stigi þegar farið er á bak stærsta hesti landsins. Hesturinn Sólon er 1.62 sentímetrar á herðakamb, eða tuttugu sentímetrum hærri en meðal hesturinn.

Sólon er reglulega mældur í hesthúsinu í Langholti tvö í Flóahreppi og alltaf kemur sama talan út, 1.62 sentímetrar á herðakamb. Samkvæmt upplýsingum frá hrossaræktarráðunaut  Ráðgjafarmiðstöðvar landbúnaðarins hefur enginn hestur sem mætt hefur í dóm síðustu fimmtán ár á Íslandi mælst meira en 1,53 sentímetrar á herðakamb.

Sólon er því mjög líklega stærsti hestur landsins. Hann er tíu vetra, ættaður frá Langafossi í Borgarfirði en eigandi í dag er Sigurður Ágústsson í Birtingarholti í Hrunamannahreppi. Kim Andersen er með Sólon í þjálfun og sölumeðferð.

„Þetta er afskaplega góður hestur í lund, það er rosalega gaman að ríða honum, hann er alhliða hestur en kemur með mjúkt tölt þegar það er búið að hita hann upp,“ segir Kim. „Hann er ótrúlega stór, ég verð nú bara að segja það, þetta er einn af þeim stærstu hestum sem ég verið með. Ég hef fengið 35 þúsund áhorf á myndband af honum, þannig að hann er aldeilis búin að slá í gegn hérna í Langholti.“

Bóndinn í Langholti segir Sólon magnaðan hest.

„Þessi hestur er virkilega góður miðað við stærð. Ég vil þó samt hafa þá aðeins minni fyrir minn smekk“, segir Ragnar Björnsson.

Kim segir að Sólon verði væntanlega seldur til Finnlands á næstunni. Aðrir hestar í hesthúsinu eru eins og kettlingar við hlið Sólons.

„Hestarnir eru bara mjög smáir, þegar maður er komin á bak, þá horfir maður bara yfir þá, það er mjög gaman“, segir Kim.​