Töskurnar skiluðu sér ekki

Ísland mætir Sviss í tveimur æfingaleikjum ytra næstu dagana, þeim fyrri í dag. Liðið er að búa sig undir erfiða leiki gegn Svartfjallalandi í júní en í húfi er sæti í lokakeppni HM 2015.

Ágúst Þór Jóhannsson, þjálfari íslenska landsliðsins, sagði að það færi vel um alla ytra þrátt fyrir erfitt ferðalag.

„Það var mikil seinkun á fluginu frá Íslandi vegna enn einnar lægðarinnar og farangurinn skilaði sér ekki í tengiflugið. En við fengum hann í [gær]nótt,“ sagði Ágúst í viðtali á heimasíðu HSÍ. „Við gátum því æft hér í morgun og eru allir leikmenn í mjög góðu standi. Allir eru heilir heilsu og að spila mikið með sínum liðum.“

Síðari æfingaleikurinn fer fram á laugardag.