Mercedes sakar verkfræðing Ferrari um njósnir

Mercedes ætlar að stefna fyrrum verkfræðingi sínum sem nú vinnur hjá Ferrari fyrir að afrita trúnaðarskjöl meðan hann vann enn hjá Mercedes.

Benjamin Hoyle tilkynnti uppsögn sína hjá Mercedes í maí síðastliðnum. Hann hafði fengið vinnu hjá helstu keppinautum Mercedes, Ferrari. Hann átti að hefja störf þar í desemberbyrjun.

Mercedes telur hoyle hafa tekið afrit af trúnaðarskjali tengdu ungverska kappakstrinum. Skjalið innihélt upplýsingar um stöðu véla liðsins og lausn við dulkóðun sem liðið notar samkvæmt heimildum Bloomberg fréttaveitunnar.

Mercedes hefur samkvæmt Bloomberg sönnun fyrir því að Hoyle hafi haldið áfram að skoða trúnaðarskjöl eftir uppsögn sína og að hann hafi reynt að hylja slóð sína.

Málsókninni er einungis beint gegn Hoyle en ekki Ferrari. Mercedes telur þó að Ferrari gæti notið góðs af þessum upplýsingum sem fengnar voru á ólögmætan hátt.

Mercedes vill koma í veg fyrir að Hoyle starfi hjá Ferrari eða einhverju öðru Formúlu 1 liði þangað til eftir tímabilið 2016.

„Við höfum gripið til viðeigandi lagalegra aðgerða til að vernda þekkingu liðsins,“ segir í yfirlýsingu Mercedes.

„Aðgerðir Hoyle voru til þess fallnar eyðileggja eða skaða alvarlega samband sem byggir á trausti. Hoyle og hugsanlega Ferrari hafa hagnast á ólögmætan hátt af ólöglegum aðgerðum hans,“ segir einnig í yfirlýsingunni.