Ísavía segir Samkeppniseftirlitið á villigötum

Talsmaður Ísavía segir Samkeppniseftirlitið beina tilmælum sínum um úthlutun afgreiðslutíma á Keflavíkurflugvelli til rangra aðila. Félagið úthluti ekki afgreiðslutímunum og sé ekki heimilt samkvæmt dómsúrskurðum að breyta þeim.

Samkeppniseftirlitið hefur birt nýjan úrskurð vegna afgreiðslutíma flugfélaga á háannatímum Keflavíkurflugvallar á morgnana og síðdegis. En WOW Air kvartaði til eftirlitsins þar sem það taldi Ísavía hygla Icelandair við úthlutun tímanna.

Samkeppniseftirlitið beinir því til innanríkisráðherra og Samgöngustofu að grípa til aðgerða vegna samkeppnishindrana sem tengist úthlutun afgreiðslutímanna.

Guðni Sigurðsson upplýsingafulltrúi Ísavía segir fjölda afgreiðslutíma á Keflavíkurflugvelli ákvarðaða út frá afkastagetu flugvallarins. Úthlutunin fari fram eftir samræmdum EES reglum sem innleiddar hafi verið hér á landi í samræmi við skuldbindingar íslenska ríkisins.

Samkvæmt reglunum sé úthlutunin á höndum sjálfstæðs samræmingarstjóra í Evrópu sem hafi úthlutað afgreiðslutímum í samræmi við þær reglur sem um úthlutun afgreiðslutíma gilda. Yfirvöld eða flugvallarrekendur viðkomandi landa megi ekki hafa afskipti af ákvörðunum hans varðandi úthlutunina og megi ekki breyta þeim úthlutunarreglum.

Guðni segir Ísavía því ekki hafa brotið neinar reglur.

„Það hefur einmitt verið úrskurðað um það af áfrýjunarnefnd samkeppnismála, héraðsdómi EFTA dómstólnum og Hæstarétti á öllum stigum þessa máls að það hafi verið farið eftir settum reglum við úthlutun afgreiðslutíma,“ segir Guðni.

Það sé mjög skýrt kveðið á um það í úrskurði Samkeppniseftirlitsins að farið sé eftir þessum reglum.

„En ef Samkeppniseftirlitið hefur eitthvað við þessar reglur að athuga ætti það að beina því til Evrópusambandsins þaðan sem þessar reglur koma. Til framkvæmdastjórnar Evrópusambandsins. Það ætti frekar að beina þessum tilmælum til þeirra heldur en þeirra sem fara eftir reglunum,“ segir Guðni Sigurðsson.