Gunnar féll um tvö sæti á styrkleikalistanum | Conor þriðji besti

Gunnar Nelson er í 14. sæti á styrkleikalista UFC í veltivigtarflokki eftir tapið gegn Demian Maia í Las Vegas um helgina.

Gunnar fellur um tvö sæti og missir þá Kelvin Gastelum og Benson Henderson fyrir ofan sig. Rick Story, sem vann Gunnar á síðasta ári, er í ellefta sæti. Þessi tvö töp eru einu töp Gunnars á MMA-ferli hans.

Sjá einnig: Maia var of stór biti fyrir Gunnar Nelson

Robbie Lawler er ríkjandi meistari í veltivigt en Rory MacDonald er efstur áskorendanna samkvæmt styrkleikaröðuninni. Maia fer upp í fimmta sætið eftir sigurinn á Gunnari og hefur því sætaskipti við Matt Brown.

Jose Aldo er ekki lengur besti bardagamaður UFC pund fyrir pund en Demetrious Johnson hefur nú tekið efsta sætið á þeim lista. Jon Jones er annar en Conor McGregor, sem rotaði Aldo á aðeins þrettán sekúndum í titilbardaga þeirra í fjaðurvigt um helgina, rýkur upp um níu sæti á listanum og er nú þriðji.

Sjá einnig: Maia  sló Gunnar 193 sinnum

Aldo fellur niður í 6.-7. sæti og deilir því með Robbie Lawler, áðurnefndum veltivigtarmeistara.

Ronda Rousey er í þrettánda sæti yfir bestu bardagamennina og Holly Holm, sem vann Rousey nýverið, er í fimmtánda sæti.