Segir fólk mega skammast sín fyrir árásirnar á Vigdísi

Karl Garðarsson, þingmaður Framsóknarflokksins, hundskammar þá sem hafa gagnrýnt Vigdísi Hauksdóttur formann fjárlaganefndar. Karl setti fram ádrepu á Facebooksíðu sinni þar sem hann segir flokksystur sína heiðarlegan stjórnmálamann, annað en segja má um suma.

Vísir greindi frá því í gær að öll spjót standi nú á Vigdísi en svo virðist sem einhver stífla hafi brostið þegar hún sagði að hún mætti sæta andlegu ofbeldi af hálfu Páls Matthíassonar forstjóra Landsspítalans, sem væri stöðugt með þá kröfugerð á hendur fjárlaganefnd að fá aukið fjármagn til spítalans.

Meðal þeirra sem gagnrýnt hafa Vigdísi er fyrrverandi þingmaður Framsóknarflokksins, Helga Sigrún Harðardóttir, sem segir „freistandi að reyna að sjúkdómsgreina þessa konu og reyna að finna merkimiða á hrokann, sjálfhverfuna, frekjuna og þetta fárveika egó.“ Helga Sigrún setur fram þá kröfu að Framsóknarflokkurinn finni Vigdísi annan vettvang.

„Ýmsir hafa notað síðasta sólarhring í að pönkast sem mest á Vigdísi Hauksdóttur. Húrrahrópin hafa verið háværust þegar spörkin hafa verið sem föstust. Þannig hefur Vigdís verið hædd, hún sökuð um óþolandi framgöngu, auk þess sem talað er um persónulegt skítkast hennar, að það þurfi að sjúkdómsgreina hana o.sv.frv. Fyrrverandi ráðherra vill ráða sálfræðing í áfallahjálp. Fjölmiðlarýnir talar um óttastjórnun,“ skrifar Karl á Facebookvegg sinn.

Karl segir að Vigdís Hauksdóttir sé langt því frá að vera yfir gagnrýni hafinn og sjálfur sé hann oft ósammála henni. „Vigdís Hauksdóttir er hins vegar heiðarlegur stjórnmálamaður og hún er trú sinni sannfæringu. Það væri óskandi að hægt væri að segja það sama um marga þá sem hafa hæst í umræðunni. Fólk sem hikar ekki við að ráðast að æru annarra. Fólk sem telur allt leyfilegt þegar Vigdís Hauksdóttir á í hlut. Þetta fólk á að skammast sín. En það eru litlar líkur á að það taki skömmina til sín.“

Ýmsir hafa notað síðasta sólarhring í að pönkast sem mest á Vigdísi Hauksdóttur. Húrrahrópin hafa verið háværust þegar...

Posted by Karl Garðarsson on 1. desember 2015