Túnisforseti lýsir yfir þrjátíu daga neyðarástandi

Beji Caid Essebsi Túnisforseti hefur lýst yfir þrjátíu daga neyðarástandi í landinu eftir að fimmtán manns féllu í sprengjuárás í Túnisborg fyrr í dag. Þá hefur útgöngubanni verið komið á í höfuðborginni.

Í frétt BBC segir að sprengjuárásin hafi verið gerð á rútu sem flutti liðsmenn lífvarðasveitar forsetans í miðborg Túnisborgar.

Enginn hópur hefur enn lýst yfir ábyrgð á árásinni. Íslamskir öfgamenn hafa nokkrum sinnum látið til skarar skríða í landinu það sem af er ári, þar á meðal í ferðamannabænum Sousse þar sem byssumaður skaut 38 manns til bana í júní.

Fjölmargir Túnisbúar hafa lagt leið sína til Íraks og Sýrlands síðustu mánuði og gengið til liðs við hryðjuverkasamtökin ISIS. Túnísk yfirvöld áætla að um þrjú þúsund túnískir séu nú í röðum vígasveita ISIS.

Sprengingin fyrr í dag varð á stoppistöð þar sem liðsmenn lífvarðasveitarinnar eru sóttir, skammt frá Hotel du Luc á breiðgötu sem kennd er við Múhammeð fimmta.

Franska blaðið Le Figaro greinir frá því að sést hafi til manns koma sprengju fyrir fyrir utan rútuna og svo hlaupa af vettvangi.