Tveggja ára dómur fyrir að hafa haft munnmök við sofandi mann

Hæstiréttur staðfesti í dag tveggja ára fangelsisdóm yfir 27 ára karlmanni, Andra Tómasi Jónssyni, fyrir kynferðisbrot gegn öðrum karlmanni. Andra var í ákæru gefið að sök að hafa haft munnmök við sofandi mann, sem ekki hafi getað spornað við verknaðnum sökum ölvunar og svefndrunga.

Atvikið mun hafa átt sér stað í gleðskap í Reykjavík í apríl 2012. Maðurinn sagði fyrir dómi að fjölmennt hafi verið í íbúðinni en þegar liðið hafi á nóttina hafi hann óskað eftir leyfi hjá húsráðanda til að gista í íbúðinni. Hann hafi lagst ölvaður í sófa í stofunni og sofnað við það. Hann hafi síðan vaknað við það að ákærði hafi legið í klofinu á honum, með typpið uppi í honum, líkt og segir í dómnum.

Maðurinn kærði árásina rúmlega ári síðar. Hann sagðist allan þann tíma hafa reynt að gleyma atvikinu, bæla það niður en að það hafi þó plagað hann reglulega. Þegar hann hafi svo séð Andra Tómas með bróður sínum hafi hann hugsað að hann þyrfti að gera eitthvað í málinu.

Andri Tómas sagðist hafa haft við manninn munnmök með hans samþykki. „Síðan þegar aðeins lengra er komið spyr ég hann: „finnst þér þetta gott?“ og hann segir „já“ og þá segi ég svona í gríni „já strákar kunna að gera þetta“ og hann segir „ég sé það og síðan segir hann „en ég held þú þurfir að hætta“ og ég segi okey og hætti og er að reyna að sannfæra hann um að leyfa mér þetta aftur og hann leyfir mér það ekki og fer síðan inn til vinar míns og fer að sofa,“ sagði hann fyrir dómi.

Dómurinn taldi sannað að maðurinn hefði ekki getað spornað við verknaðnum, og var hinn áfrýjaði dómur því staðfestur. Andra Tómasi er gert að greiða manninum eina milljón króna í skaðabætur og allan áfrýjunarkostnað málsins, 1,2 milljónir.