Forseti Mjanmar óskar Suu Kyi til hamingju

Thein Sein, forseti Mjanmar, hefur óskað Aung San Suu Kyi og stjórnarandstöðuflokki hennar til hamingju með árangurinn í þingkosningunum sem fram fóru á sunnudag.

Í frétt BBC kemur fram að flokkur Suu Kyi hafi hlotið um 90 prósent af þeim þingsætum sem búið er að tilkynna. Enn á eftir að greina frá skiptingu um 60 prósent þingsæta.

Suu Kyi hefur sent leiðtogum landsins bréf þar sem hún biður um að teknar verði upp viðræður um þjóðarsátt. Talsmaður stjórnarinnar segir að slíkar viðræður geti þó einungis farið fram þegar endanleg úrslit liggja fyrir.

Stjórnarflokkurinn, sem nýtur stuðnings hersins, virðist einungis hafa hlotið um fimm present þingsæta.

Samkvæmt kosningalögum á herinn rétt á fjórðungi þingsæta.