Móðirin hafði samband og baðst afsökunar

„Við sáum að þetta var ungur drengur og vildum gefa honum tækifæri til að bæta fyrir brot sín og koma sér inn á beinu brautina, án þess þó að þurfa að leita til lögreglu,“ segir Sigurður Þór Helgason, eigandi verslunarinnar iStore.

Fingralangur bætti fyrir brot sín

Verslunin birti í gær mynd á Facebook af ungum pilt sem hafði heimsótt verslunina á dögunum, en haft á brott með sér raftæki fyrir um tuttugu þúsund krónur. Myndin vakti nokkra athygli og ekki leið á löngu þar til móðir drengsins hafði samband við Sigurð Þór.

„Móðir hans hafði samband við mig í gærkvöldi og við áttum gott samtal. Hún var virkilega þakklát hvernig við tókum á þessu, bað mig innilegrar afsökunar og skilaði því sem sonur hennar tók,“ segir Sigurður, sem ekki vill gefa upp hvað það var sem drengurinn tók ófrjálsri hendi. Um hafi verið að ræða mikilvægan hlut sem verslunin hafi ekki mátt verða af. Því hafi verið mikilvægt að hafa hraðar hendur.

Facebook árangursríkari en lögreglan

„Fyrst og fremst ákváðum við að fara þessa leið sökum þess hve ungur drengurinn er. En einnig töldum við þessa leið árangursríkari en að leita til lögreglu, þar sem rannsókn tekur oft langan tíma,“ útskýrir hann. „Við pössuðum okkur að afmá andlit hans alveg þannig að einungis hann sjálfur myndi þekkja sig á myndunum, þ.e af fötunum,“ bætir hann við en færslunni hefur nú verið eytt af síðu verslunarinnar.

Þá segir Sigurður það ekki algengt að stolið sé úr versluninni. Afar öflugt myndavéla- og þjófavarnarkerfi sé til staðar.

Nú rétt í þessu var móðir piltsins sem sjá mátti með hulið andlit á mynd frá okkur fyrr í kvöld að skila því sem...

Posted by iStore Íslandi on 10. nóvember 2015