Tveir særðir eftir hnífaárás í skóla í Bretlandi

Unglingspiltur er í haldi lögreglu, grunaður um að hafa stungið tvo samnemendur sína í Kingsdale-skóla í suðurhluta London í dag. Annar nemandinn er alvarlega særður, hinn á batavegi, að því er segir á vef Telegraph. Báðir eru fimmtán ára.

Lögreglu barst tilkynning um árásina á fjórða tímanum í dag. Mikill viðbúnaður var við skólann að sögn sjónarvotta; fjöldi lögreglumanna og þyrla.

Drengurinn var handtekinn á vettvangi og samkvæmt breskum fjölmiðlum hefur viðstöddum verið boðin áfallahjálp. Ekki liggur fyrir hvað drengnum gekk til, en málið er nú í rannsókn lögreglu.