Loka Kirkjufjöru vegna hættu á grjóthruni

Umhverfisstofnun hyggst loka aðgengi að Kirkjufjöru til bráðabirgða og brýnir það fyrir fólki að fara alls ekki niður í fjöruna þar sem líkur eru á því að það muni hrynja úr klettunum sem eru ofan við fjöruna. Mikið grjóthrun varð í Dyrhólaey í liðinni viku sem fór alveg niður í fjöruna.

Frá þessu er greint á Facebook-síðu Umhverfisstofnunar en þar segir jafnframt að Veðurstofan muni um miðja þessa viku gera nákvæmari athugun á stöðugleika bjargbrúnarinnar. Í kjölfarið mun koma í ljós hvort ástæða sé til að varast umferð um fjöruna eða bjargbrúnir Dyrhólaeyjar.

Þá hefur Umhverfisstofnun óskað eftir fundi með Almannavarnarnefnd Mýrdalshrepps og lögreglu þar sem rætt verður um viðbrögð við auknu hruni úr klettum Dyrhólaeyjar.