Vinnsla kalkþörungasets leyfð úr Ísafjarðardjúpi

Íslenska kalkþörungafélagið hefur fengið heimild Orkustofnunar til tilraunatöku á 600 rúmmetrum af kalkþörungaseti af hafsbotni austan Æðeyjar og út af Kaldalóni í Ísafjarðardjúpi. Taka á 300 rúmmetra á hvorum stað.

Vísað er til ákvörðunar Skipulagsstofnunar frá október um að umbeðin tilraunataka af hafsbotni í Ísafjarðardjúpi sé ekki líkleg til að hafa í för með sér umtalsverð umhverfisáhrif og þar af leiðandi ekki háð mati á umhverfisáhrifum.

„Með tilraunatökunni er fyrirhugað að ljúka þeim rannsóknum sem fyrirtækið hefur staðið fyrir í Önundarfirði og Ísafjarðardjúpi, að meðtöldum Jökulfjörðum, frá árinu 2011,“ segir á vef Orkustofnunar.

Tekin verða minnst 24 sýni af kalkþörungasetinu, síðan verður kornastærðin greind og efnin sem í sýnunum finnast. Að auki verður gerð skýrsla um dælinguna.