Þrjár milljónir til Evrópu

Evrópusambandið reiknar með því að þrjár milljónir flóttamanna muni koma til aðildarríkja þess fram til loka ársins 2017, til viðbótar þeim sem þegar eru komnir.

Framkvæmdastjórn ESB segir að þetta hafi jákvæð áhrif á efnahagslíf ríkjanna. Hagvöxtur aukist, en þó aðeins um 0,2 til 0,3 prósent.

Stríðsástandið í Sýrlandi á stærstan þátt í flóttamannastraumnum til Evrópu, en næst koma Afganistan og Sómalía. Meira en fimm þúsund manns koma nú yfir hafið frá Tyrklandi til Grikklands á degi hverjum.