Viðskipti innlent

Kínverskt skipafélag undirbýr áætlunarsiglingar um Íshafið

Kristján Már Unnarsson skrifar
Forstjóri Cosco, Li Yunpeng, hitti forseta Íslands, Ólaf Ragnar Grímsson, fyrir tveimur árum þegar hann sótti Arctic Circle-ráðstefnuna.
Forstjóri Cosco, Li Yunpeng, hitti forseta Íslands, Ólaf Ragnar Grímsson, fyrir tveimur árum þegar hann sótti Arctic Circle-ráðstefnuna. Mynd/Cosco.
Stærsta skipafélag heims, kínverska ríkisskipafélagið COSCO, kannar nú möguleika á að hefja fastar áætlunarsiglingar norðausturleiðina um Íshafið milli Evrópu og Asíu. Kínverska fréttastofan Xinghua greindi frá þessu í nýliðinni viku og vitnaði í forstjóra öryggis- og tæknimála skipafélagsins, sem sagði til skoðunar að auka siglingar um norðausturleiðina.

Ísbrjóturinn Snædrekinn var fyrsta skip Kínverja sem sigldi norðausturleiðina sumarið 2012. Fyrsta viðkomuhöfnin frá Shanghai var Reykjavík.
Japan Times hafði eftir talsmanni COSCO að markmiðið væri reglubundnar áætlunarsiglingar um Íshafið, en engar tímasetningar voru nefndar um hvenær þær myndu hefjast. Í fréttum af málinu kemur þó fram að siglingaleiðin sé aðeins fær hluta ársins, frá júli og fram í nóvember.

Yfirlýsingar Kínverja koma í framhaldi af siglingu flutningaskipsins Yong Sheng þessa leið í sumar, frá Shanghai til Rotterdam og til baka. Það tók skipið 27 daga að sigla þessa 7.800 sjómílna leið. Við það spöruðust níu dagar og 2.800 sjómílur miðað við það að fara hefðbundna leið um Indlandshaf og Súezskurðinn. 

Norðausturleiðin nýttist íslenskum útflutningsafurðum í fyrsta sinn í sumar þegar leiguskipið Winter Bay sigldi með hvalkjöt fyrir Hval hf. frá Hafnarfirði til Japans. Kínverski ísbrjóturinn Snædrekinn varð hins vegar fyrstur sumarið 2012 til að sigla frá Asíu til Íslands um heimskautið. Það var jafnframt fyrsta sigling kínversks skips um norðausturleiðina.

Winter Bay við bryggju í Hafnarfirði í vor. Skipið sigldi norðausturleiðina með 1.700 tonn af langreyðarkjöti til Japans.VÍSIR/ERNIR
Forstjóri kínverska skipafélagsins átti fund með Ólafi Ragnari Grímssyni, forseta Íslands, fyrir tveimur árum þegar hann sótti Arctic Circle-ráðstefnuna en COSCO er einn af samstarfsaðilum hennar. Kínverski forstjórinn hitti einnig Gunnar Braga Sveinsson utanríkisráðherra. 

Bandaríska Wall Street Journal fjallaði um áform Cosco með viðtali við Björn Gunnarsson, framkvæmdastjóra Center for High North Logistics í Kirkenes. Björn var áður deildarforseti við Háskólann á Akureyri og rektor RES-orkuskólans en stýrir nú CHNL í Norður-Noregi, sem er samstarfsmiðstöð norskra stjórnvalda og skipafélaga um þróun norðurslóðasiglinga. Wall Street Journal hefur eftir Birni að áform Cosco sýni þau tækifæri sem felist í norðausturleiðinni. Mun meira þurfi þó til áður en hún verði mikilvæg siglingaleið. Vöruhafnir þurfi að byggjast upp til að þjóna leiðinni en einnig varnir gegn olíuslysum og leitar- og björgunarþjónusta.

Norðausturleiðin liggur um efnahagslögsögu Rússlands. Myndin er tekin úr rússneskum ísbrjóti að ryðja leiðina fyrir skipalest.Mynd/Rosatomflot.

Tengdar fréttir

Kínverjar vilja fjárfesta í umskipunarhöfn á Íslandi

Kínverjar hafa rætt við íslensk stjórnvöld um að byggja hafnarmannvirki á Íslandi vegna siglinga yfir Norðurskautið. Þetta upplýsir Össur Skarphéðinsson utanríkisráðherra en á ráðstefnu í dag sagði hann mestu viðskiptatækifæri Íslendinga á þessari öld tengjast heimskautasvæðunum. Salurinn á Grand hótel Reykjavík var þéttsetinn á ráðstefnu sem utanríkisráðuneytið, Samtök atvinnulífsins og Íslandsstofa efndu til um sóknarfæri á norðurslóðum.

Marorka fundaði með Cosco Group

Íslensk sendinefnd skipuð fulltrúum úr utanríkisþjónustunni og starfsmönnum Marorku fundaði í síðustu viku með stjórnendum kínverska skipafélagsins Cosco Group. Á fundinum var rætt samstarf milli Marorku og Cosco sem er eitt stærsta skipafélag heims.

Stór áfangi að þjónustuhöfn Norðurslóða við Finnafjörð

Oddviti Langanesbyggðar hefur fulla trúa á því að risahöfn við Finnafjörð verði að veruleika eftir að eitt stærsta hafnafyrirtæki Evrópu, Bremenports, ritaði undir samstarfssamning um að kosta mörghundruð milljóna króna undirbúningsvinnu.

Snædrekinn kominn til Reykjavíkur

Kínverska rannsóknarskipið og ísbrjóturinn Snædrekinn liggur nú við Ytrihöfn í Kollafirði. Það lagðist að bryggju um níu leytið í morgun.






Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SIMINN
6,9
58
355.843
ICEAIR
2,37
249
820.226
LEQ
1,46
2
1.138
ORIGO
0,81
8
49.987
BRIM
0,67
11
11.558

Mesta lækkun dagsins


Félag
Br.%
Fjöldi
Velta*
REGINN
-2,65
5
46.100
EIK
-2,34
13
38.828
EIM
-2,07
6
142.688
FESTI
-1,83
11
608.952
REITIR
-1,83
7
64.628
Velkomin á Vísi. Þessi vefur notar vafrakökur. Sjá nánar.