Fáir komu til að kjósa

Engin raunveruleg stjórnarandstaða tekur þátt í þingkosningunum í Egyptalandi, sem hófust á sunnudag og standa fram í byrjun desember.

Dræm þátttaka var á sunnudaginn, ekki nema um það bil 10 prósent, en það bendir til þess að Abdel Fattah al-Sisi forseti og herforingjastjórn hans njóti minni stuðnings en hann gerði sér vonir um.

Sisi steypti forvera sínum, Mohamed­ Morsi, af stóli í júlí árið 2013, einu ári eftir að Morsi sigraði í fyrstu lýðræðislegu forsetakosningum landsins.

Síðan þá hefur í raun ekkert þing starfað í landinu. Þingkosningunum hefur ítrekað verið frestað, en fyrst stóð til að þær yrðu haldnar vorið 2013. Nú er loks komið að því að kjósa þing, en gildi kosninganna verður takmarkað vegna fjarveru stjórnarandstöðunnar.

Starfsemi Bræðralags múslima, samtaka Mohameds Morsis, hefur verið bönnuð í Egyptalandi síðan í desember árið 2013, eina ferðina enn, og samtökin flokkuð sem hryðjuverkasamtök, þrátt fyrir að þau hafi notið víðtæks stuðnings meðal almennings fyrir allt annað en hryðjuverk.

Liðsmenn samtakanna voru með meirihluta á þingi þegar Morsi var forseti, en þeir mega ekki taka þátt í kosningunum núna. Aðrir stjórnarandstæðingar, sem kæmu úr röðum vinstri manna og veraldlega sinnaðra flokka, hafa hins vegar kosið að taka ekki þátt í kosningunum og hvetja stuðningsmenn sína til þess að ganga ekki til atkvæða.

Morsi var dæmdur til dauða fyrr á þessu ári, en um leið var hann dæmdur í ævilangt fangelsi. Hann situr enn í fangelsi ásamt fjölda stuðningsmanna, sem allir voru teknir fastir og sakaðir um margvísleg brot.

Sjálfur hefur Morsi sagt réttarhöldin marklaus, enda hafi hann verið réttkjörinn forseti landsins og steypt af stóli í ólöglegri byltingu hersins. Sisi var sagður hafa sigrað í forsetakosningum á síðasta ári með 94,5 prósentum atkvæða, en kosningaþátttakan var ekki nema 47,5 prósent.

Kosningarnar fara fram í tveimur meginlotum, með fyrri og seinni umferð í báðum. Sú fyrri nær til suður- og vesturhluta landsins, fyrri umferðin 18. og 19. október en seinni umferðin 27. og 28. október. Seinni lotan nær til norður- og austurhluta landsins og verður fyrri umferð hennar dagana 21. og 22. nóvember en sú seinni 1. og 2. desember.