Árásina má rekja til fíkniefnaneyslu

Hæstiréttur hefur staðfest úrskurð Héraðsdóms Reykjavíkur þess efnis að karlmaður, grunaður um líkamsárás, sæti áfram gæsluvarðhaldi til 9. nóvember næstkomandi. Hann hefur setið í gæsluvarðhaldi frá 17. ágúst síðastliðnum.

Hinn grunaði ávarpaði héraðsdóm og lýsti því yfir að gjörðir hans mætti að mestu rekja til fíkniefnaneyslu hans. Hann sæi eftir því sem hann gerði og teldi það rangt. Hann ætli að snúa við blaðinu, hætta neyslu fíkniefna og stefna að betra lífi. Hann hefði setið lengi í gæsluvarðhaldi og vildi aðeins komast út í þann stutta tíma þar til hann hlyti dóm.

Verjandi mannsins benti á læknavottorð sem ekki hafði legið fyrir er Hæstiréttur úrskurðaði skjólstæðing hans síðast í gæsluvarðhald þann 24. ágúst síðastliðinn. Einnig væri allt útlit fyrir að framburður brotaþola um frelsissviptingu væri ekki á rökum reistur. Ætti því að létta gæsluvarðhaldinu. Þeim málflutningi var hafnað og staðfesti dómurinn niðurstöðu héraðsdóms.

Réðst á par með hnífi og hamri

Maðurinn er grunaður um að hafa, ásamt öðrum manni, rutt sér inn í íbúð í Breiðholti og veist að stúlku og kærasta hennar vegna meints fíkniefnastuldar. Báðir mennirnir eiga sögu um ofbeldisbrot áður.

Fórnarlömbin kölluðu eftir aðstoð lögreglu en þá voru árásarmennirnir á bak og brott. Þau voru með skurð í andliti eftir hníf og kærastinn var einnig með skurð á fæti og sagðist hann einnig hafa verið laminn með hamri.

Mennirnir tveir voru handteknir í íbúð annars þeirra daginn eftir og við leit þar fundust fartölva og gsm sími sem hafði verið tekinn af parinu. Þar að auki fundust blóðugar buxur í óhreinu taui og einnig blóðugur bolur. Lögregluþjónar fundu einnig hníf með blóðkámi í vasa eins þeirra, dúkahníf með blóðkámi í stofu íbúðarinnar og klaufhamar í gluggakistu svefnherbergis.

Þann 12. júní síðastliðinn var maðurinn, sem var úrskurðaður í gæsluvarðhald, dæmdur í níu mánaða skilorðsbundið fangelsi fyrir líkamsárás. Þá veittist hann að manni með hnífi og skar hann á framhandlegg og kinn. Brotaferill hans nær allt til ársins 2005.