Sögulegur árangur hjá Haraldi

Östersund tryggði sér í kvöld sæti í efstu deild karla í Svíþjóð er liðið gerði 1-1 jafntefli við Syrianska í næstsíðustu umferð tímabilsins í sænsku B-deildinni.

Haraldur Björnsson lék allan leikinn í marki Östersund en fékk á sig klaufalegt mark undir lok fyrri hálfleiks. Östersund jafnaði þó metin í þeim síðari og gat því fagnað í leikslok.

Þetta er í fyrsta sinn í nítján ára sögu félagsins sem það kemst upp í úrvalsdeildina en liðið var í sænsku D-deildinni fyrir aðeins fjórum árum síðan.

Haraldur kom til Östersund frá Sarpsborg 08 í Noregi í fyrra en byrjaði tímabilið á bekknum. Hann hefur verið aðalmarkvörður liðsins síðan í byrjun september.