Nýtt Íslandsmet: Lögreglan lagði hald á 57 kíló af maríjúana

Fíkinefnabrotum og ofbeldisbrotum á höfuðborgarsvæðinu á árinu 2014 fjölgaði á milli ára. Tvo manndráp og fjórar tilraunir til manndráps voru skráðar og lagt var hald á 57 kg af marijúana.

Þetta kemur fram í skýrslunni Afbrot á höfuðborgarsvæðinu 2014 sem gefin er út af lögreglu og kom nýverið út.

Tilkynningum um ofbeldisbrot fjölgaði um 13 prósent frá árinu 2013. Lögreglu bárust 880 tilkynningar um ofbeldisbrot árið 2014, þar af voru rúmlega 78 prósent tilkynningana vegna minniháttar líkamsárása.

Lagt hald á 57kg af marijúana

Fíkniefnabrotum fjölgaði um tæplega 15 prósent á milli áranna 2013 og 2014. Fíkniefnabrotum hefur fjölgað stöðugt síðustu ár og er þessi fjölgun að mestu tilkomin vegna fjölgunar brota er varða vörslu og meðferð ávana- og fíkniefna og flutnings fíkniefna á milli landa. 

Á heildina litið var lagt hald á örlítið meira magn fíkniefna árið 2014 miðað við árið 2013, en oft eru miklar sveiflur á haldlögðu magni á milli ára. Mest magn var tekið af marijúana, tæplega 57 kíló. Ekki hefur verið lagt hald á eins mikið magn af marijúana á einu ári frá því að samræmdar skráningar hófust hjá lögreglu árið 1999.

Kynferðisbrotum fækkar milli ára

Kynferðisbrotum fækkaði hlutfallslega mest á milli ára. Tilkynningum um kynferðisbrot fækkaði um 43 prósent. Á heildina litið hefur tilkynningum um kynferðisbrot verið að fjölga ár frá ári frá árinu 2005. Fækkunin á milli ára skýrist af metfjölda tilkynninga árið 2013, brotum fjölgaði þá um níu prósent miðað við meðalfjölda árin 2010 til 2012.

Skýrsluna í heild sinni má lesa hér.