Kirkjuþing vill afnema samviskufrelsi presta

Á nýloknu kirkjuþingi var álykað að kirkjan ætti að afnema samviskufrelsi presta og að meðlimir þjóðkirkjunnar ættu að taka vel á móti nýjum Íslendingum. Kirkjuþinginu lauk í gær eftir „líflegar og opinskáar umræður“.

Kirkjuþing hefur ályktað að prestum þjóðkirkjunnar ætti ekki að vera heimilt að synja tveimur einstaklingum um hjónavígslu á grundvelli kynhneigðar. 

„Kirkjuþing tók undir með biskupi Íslands sem áður hafði tekið af öll tvímæli um þetta í bréfi sínu til ráðherra. Þar kom m.a. fram að biskup myndi ekki gera tillögu til ráðherra um sérstakar reglur er heimili prestum að synja fólki um hjónavígslu á grundvelli kynhneigðar,“ segir í tilkynningu frá Biskupsstofu.

„Með samþykkt kirkjuþings er undirstrikað að kirkjan er fyrst og fremst farvegur kærleika Krists og fagnar lífinu í öllum sínum fjölbreytileika.“

Kirkjuþing samþykkti einnig sáttmála sem beint er til sókna þjóðkirkjunnar. Þar segir meðal annars:

Við í sókninni viljum hjálpast að til að taka vel á móti nýjum Íslendingum með því að:

Hafa eyru og hjörtu opin fyrir reynslu og líðan þeirra sem koma hingað frá öðrum löndum og reyna að fóta sig í nýju landi.

Sýna gestrisni og skilning á ólíkum aðstæðum fólks.

Taka sérstaklega vel á móti börnum og ungmennum sem eru ný í landinu.

Virða þá staðreynd að nýir Íslendingar geta haft annan trúarlegan og menningarlegan bakgrunn en flestir sem búa hér.

Iðka okkar eigin trú án þess að gera lítið úr öðrum trúarbrögðum eða þeim sem aðhyllast þau.

Vera talsmenn þeirra sem hafa ekki rödd í samfélaginu, tala vel um nýja Íslendinga og taka ekki undir fordóma og illt umtal um þá, t.d. á samfélagsmiðlum.

Vera opin fyrir samstarfi við önnur félagasamtök og stofnanir sem vinna í þágu betra samfélags.

Byggja á reynslu stofnana á borð við Velferðarráðuneytið, Rauða krossinn og Hjálparstarf kirkjunnar sem hafa gefið út viðmið og leiðbeiningar um móttöku flóttafólks og hælisleitenda.