Auglýsir eftir nýra fyrir systur sína á Facebook

Sigríður María Jónsdóttir hefur auglýst eftir nýra fyrir systur sína Bryndísi Jónsdóttur. Hún setti inn ákall til vina sinna á Facebook undir yfirskriftinni: „Áttu nýra til að gefa Bryndísi Jónsdóttur?“ Síminn hefur ekki stoppað, segir Sigríður María í samtali við Vísi.

Færsla Sigríðar Maríu hefur vakið mikla athygli en þar greinir frá því að Bryndís hafi verið að berjast við erfið veikindi frá árinu 2001. „Nokkuð lengi hefur hún verið með skerta nýrnastarfsemi og nú er svo komið að nýru hennar eru nánast hætt að starfa.

Því er nokkuð ljóst að Bryndís þarf á nýju nýra að halda. Því miður hefur ekki fundist nýra sem passar hjá fjölskyldu og vinum. Næsta skref verður að Bryndís þarf að vera föst í nýrnavél 3 daga í viku til að lifa af þar til nýra finnst.“

Heilsa Bryndísar er orðin mjög slæm og ekki víst að hún geti beðið á löngum biðlista. „Því höfum við ákveðið að stíga þau þungu skref að óska opinberlega eftir nýra. Aðalatriðið er að nýrnagjafi sé í blóðflokki O.“

Og Sigríður María biðlar til vina sinna og kunningja: „Ef þið getið lagt okkur lið og bjargað lífi Bryndísar hafið samband við okkur í gegnum facebook eða í síma 865 1887, 863 6309.“

Sigríður María segir viðbrögðin hafa verið afar góð, miklu betri en hún þorði að vona.  „Alveg ótrúleg. Ég hef verið á fullu í símanum og hef verið að fá skilaboð.“

En, staðan núna?

Þau eru nú að bíða með að setja hana í vél, átti að fara í ágúst en tafðist vegna verkfallsins. Var sett á lyf sem átti að halda henni góðri. Hún er það veik að hún ætti að vera komin í vélina. Ekki mikið að geta hugsað um fjölskyldu sína.“

Bryndís, sem fædd er 1977, er menntaður leikskólakennari, hún hefur lokið uppeldisfræði en er nú öryrki. En, málið er ekki einfalt. Því ekki er nóg að einhver gefi sig fram sem er til í að gefa nýra. „En það sem þau vilja á Landsspítalanum er að það sé einhver kunningsskapur, einhver tengsl. Ég veit ekki af hverju það er. Kona fyrir ári síðan sem auglýsti í sjónvarpinu, en það var stoppað eftir það. Vilja helst að það sé vinur eða ættingi. sem er fáránlegt því það eru svo margir á biðlista, og það væri hægt að stytta hann, kannski ,ef það væri hægt að rýmka þessar reglur. Ekkert allir sem komast af þessum biðlista.