66°Norður úlpum stolið úr auglýsingu

Bíræfnir aðilar hafa í tvígang brotist inn í auglýsingu í miðbæ Reykjavíkur og stolið úr henni 66°Norður úlpu.

66°Norður setti upp auglýsingu utan á strætóskýli í Lækjargötu í miðborg Reykjavíkur þar sem úlpu frá fyrirtækinu hafði verið komið fyrir innan í sérstöku gleri. Aðfaranótt fimmtudags sá sér einhver leik á borði, braut glerið og nældi sér í úlpuna.

Auglýsingin var sett upp á nýjan leik og nýrri úlpu komið fyrir en henni var stolið í nótt. Sömu aðferð var beitt, glerið brotið og úlpan tekin.

Ekki liggur ljóst fyrir hvort að sami aðili sé á bakvið úlpuþjófnaðinn en málið hefur verið kært til lögreglu.