Ætlar ekki að fara á vasapeninga

„Ég ætla ekki að fara á vasapeninga, það er mannréttindabrot,“ segir Guðrún Einarsdóttir ellilífeyrisþegi. Guðrún hefur barist fyrir afnámi vasapeningakerfisins og hærri ellilífeyri síðustu ár. Hún var sett á vasapeninga í vor eftir að hafa þurft að leita sér hjúkrunar vegna langvinnra veikinda. Hún mótmælti því harðlega og fór á fund aðstoðarmanns ráðherra. Eygló Harðardóttir, húsnæðis- og félagsmálaráðherra, lýsti því yfir í júní að hún vildi afnema vasapeningakerfi.

Í dag dvelur Guðrún á Hrafnistu og um næstu mánaðamót á hún að fara á vasapeninga til frambúðar. Hún er ósátt við að þingmenn og ráðherrar geri vel við sig á meðan ellilífeyrisþegar lifa undir fátæktarmörkum. Hún nefnir sérstaklega að þrjátíu milljónir hafi farið í dagpeninga þingmanna á þessu kjörtímabili.

„Á meðan þeir þiggja tugi milljóna í dagpeninga í reisum sínum þá fá aldraðir lítið sem ekkert. Ég gef lítið fyrir þá hækkun sem boðuð er á ellilífeyri á meðan réttur fjölda aldraðra er brotinn með því að skikka þá á vasapeninga. Þá eiga aldraðir jafnt sem aðrir rétt á því að vera á lágmarkslaunum, það dugar ekkert minna en þrjú hundruð þúsund krónur. Af minni upphæð er ekki hægt að lifa.“

Í nokkur ár hefur staðið til að endurskoða frá grunni fyrirkomulag greiðslna einstaklinga sem búa á hjúkrunarheimilum og afnema þar með svonefnt vasapeningakerfi. 

Um áramótin 2016/2017 fer af stað tilraunaverkefni velferðarráðuneytis á nokkrum hjúkrunarheimilum þar sem vasapeningar verða afnumdir.