Leita leiða til að ferja vinnandi hendur

Isavia, í samstarfi við nokkur fyrirtæki tengd starfsemi á Keflavíkurflugvelli, vinnur að gagnasöfnun um þarfir þeirra, og fyrirtækja á Suðurnesjum almennt, varðandi almenningssamgöngur á svæðinu. Rót vinnunnar liggur í snarbatnandi atvinnuástandi á Suðurnesjum og sívaxandi fjölda fólks sem sækir vinnu á Suðurnesin.

Sigurður Ólafsson, framkvæmdastjóri mannauðssviðs hjá Isavia, segir, þegar litið er til baka um nokkur ár, það gleðilegt að fyrirtæki á svæðinu þurfi að leita út fyrir Suðurnesin að starfskröftum. „Við byrjuðum í sumar, með samstarfsfyrirtækjum okkar á flugvallarsvæðinu, að ræða hvernig þau leystu sín mál. Það kom í ljós að um 200 manns sem eru að vinna á flugvallarsvæðinu eru búsettir í Reykjavík. Drjúgur hluti þess hóps er vaktavinnufólk sem byrjar sinn vinnudag á mismunandi tímum sólarhringsins,“ segir Sigurður og bætir við að almenningssamgöngurnar svari ekki þörfum þessa hóps að fullu, t.d. um helgar.

„Við ræddum hvernig þetta verður best leyst, og ein leiðin væri að Isavia og þessi fyrirtæki færu saman í rekstur á samgöngukerfi, þó að sú vinna sé ekki komin langt. Það er erfitt að koma þessu öllu heim og saman fyrir mörg fyrirtæki. Fókusinn fór því fljótt á annaðhvort að gera samning við aðila sem gæti keyrt okkur á milli eða að skoða hvað Strætó og sveitarfélögin á Suðurnesjum væru tilbúin að gera. Við höfum fundað með Sambandi sveitarfélaga á Suðurnesjum og fengum góðar undirtektir og vinnum nú að því að taka saman frekari gögn.“

Ein af þeim leiðum sem ræddar hafa verið er að setja upp hraðleið sem fer beint upp á Keflavíkurflugvöll einhverja tíma dagsins, enda hefur Isavia, og önnur fyrirtæki á svæðinu, fundið fyrir mjög batnandi atvinnuástandi á Suðurnesjum og hækkandi hlutfalli umsækjenda um störf sem búa í Reykjavík.

Nýjar tölur Vinnumálastofnunar sýna að atvinnuleysi á landsvísu í september stóð í 2,4%. Á Suðurnesjum er það enn þá hæst yfir landið en er þó aðeins 2,9%. Ber þá að líta til þess að atvinnuleysistölur í sama mánuði 2009 og 2010 voru 12,1% og 11,3%. Tala sama mánaðar í fyrra var 4,5%.

Viðmælendur Fréttablaðsins sem reka fyrirtæki utan flugvallarsvæðisins upplifa stöðuna með sama hætti.

Sigurður Ragnarsson, framkvæmdastjóri hjá verktakafyrirtækinu ÍAV, segir hugmynd um að virkja almenningssamgöngur allrar athygli verðar. „Við erum með mikið af verkefnum á Suðurnesjum og þar hefur verið mjög erfitt að fá mannskap til starfa. Við höfum hingað til ekki verið að nýta okkur almenningssamgöngur á milli Suðurnesja og Reykjavíkur en myndum vissulega skoða þær ef ferðum myndi fjölga, sérstaklega á þeim tímum þar sem fólk fer úr og í vinnu,“ segir Sigurður.