Grunaðir hryðjuverkamenn og ISIS-liðar í Leifsstöð

Hingað til lands hafa komið ferðamenn sem lögreglu grunar að hafi tengsl við hryðjuverkasamtök. För þeirra hefur ekki verið stöðvuð heldur er yfirvöldum í því landi sem fólkið ferðast til gert viðvart.

Þetta kemur fram í skýrslu Ríkislögreglustjóra um komu flóttafólks og aukið álag við landamæraeftirlit. Ráðherraráð Evrópusambandsins gaf út 15. júní í sumar að innleiða ætti almenna áhættuvísa við landamæravörslu.

Þessir áhættuvísar hafa verið teknir upp á Keflavíkurflugvelli. Landamæraverðir eiga að vera á sérstöku varðbergi gagnvart fólki sem uppfyllir flokkun ESB. Nokkrum sinnum hefur vaknað grunur um að einstaklingur hafi tengsl við hryðjuverkastarfsemi. Sérstaklega er horft til tengsla við hryðjuverkasamtökin ISIS.

Að meðaltali fara fjórtán þúsund farþegar um Keflavíkurflugvöll daglega. Ólafur Helgi Kjartansson, lögreglustjóri á Suðurnesjum, segir að skoðað sé hvort fólk þyki líklegt til að vera tengt hryðjuverkum. Svo sem hvaðan það er að koma, hvert það sé að fara, hvort það ferðist eitt eða hafi þekkt tengsl.

„Við höfum ákveðnar skyldur gagnvart öðrum ríkjum. Menn hafa sérstaklega verið að reyna að fylgjast með því hvort það sé verið að flytja fólk til ISIS-liða eða hvort fólk sé að koma frá þeim. Þá höfum við látið vita,“ segir Ólafur.

Lögreglustjórinn segir meðalhófs gætt.

„Við þurfum að passa að ganga ekki of nærri fólki sem hugsanlega er ekkert nema sakleysið. Þó að menn hafi einhvern tíma framið brot eða liggi undir grun þá er ekki hægt að grípa þá á meðan það hefur ekkert sannast á þá.“

Innanríkisráðuneytið breytti reglugerð um för yfir landamæri 28. september síðastliðinn. Í breytingunni segir að innanríkisráðherra sé heimilt að taka upp tímabundið eftirlit á innri landamærum vegna alvarlegrar ógnar við allsherjarreglu eða þjóðaröryggi. Ákvörðunin sé tekin á grundvelli áhættumats frá ríkislögreglustjóra og í samráði við framkvæmdastjórn Evrópusambandsins.

Hingað til hafa grunaðir hryðjuverkamenn einungis millilent hér á landi að sögn Ólafs Helga.

„Það má kannski segja að það virðist ekki vera sem Ísland sé lokamark fólks í þessum hugleiðingum. Við höfum ekki séð nein merki þess að hryðjuverkamenn líti á Ísland sem endanlegan áfangastað,“ segir Ólafur.