Viðskipti innlent

Safna metfé á Kickstarter: Íslenskir bræður vilja færa almenningi vindorku

Bjarki Ármannsson skrifar
Trinity-túrbínan hefur vakið athygli víða um heim.
Trinity-túrbínan hefur vakið athygli víða um heim. Mynd/Janulus

Íslenskir bræður sem vilja auðvelda almenningi að notast við endurnýjanlega orku hafa safnað um 150 þúsund Bandaríkjadölum, eða tæpum nítján milljónum króna, á vefsíðunni Kickstarter til að fjármagna framleiðslu á ferðavindtúrbínum sínum. Hugmynd þeirra hefur jafnframt vakið athygli fjölmiðla utan landsteinanna, en CBS News hyggst senda tökulið til Íslands í næsta mánuði til að fylgjast með framleiðslunni.

Ágúst og Einar með túrbínu sem framleidd var með þrívíddarprentara. Mynd/Janulus

„Við erum búnir að fá svo mikið lof fyrir þetta að við erum alveg í skýjunum, það er ekki annað hægt að segja,“ segir Ágúst Arnar Ágústsson, sem stýrir fyrirtækinu Janulus ásamt Einari bróður sínum. „Við erum strax farnir að gera ráðstafanir til að hefja framleiðslu á þessu og erum þvílíkt spenntir.“

Ólíklegt verður að teljast að nokkuð íslenskt verkefni hafi safnað meira fjármagni í hópsöfnun sem þessari en Trinity-vindtúrbína þeirra Ágústs og Einars. En hvað er Trinity og hvers vegna hefur hugmyndin vakið svona mikla athygli?

Vilja innleiða „íslensku leiðina“ í útlöndum
Hugmyndin á bak við tækið er að gera vindorku aðgengilegri og ódýrari, meðal annars með því að draga úr uppsetningarkostnaði með því að sameina vöruna, rafhlöður, hleðslustýringu og fleira í eitt stykki.

Bræðurnir segja almenning þurfa sífellt meira rafmagn og að með Trinity-vélunum geti fólk í útlöndum innleitt „íslensku leiðina“ á heimili sitt eða fyrirtæki – það er, að framleiða rafmagn með endurnýjanlegum orkugjafa þannig að gott sem engar áhyggjur þurfi að hafa af rafmagnsreikningnum.

Túrbínurnar verða framleiddar í fjórum stærðum og eru hugsaðar fyrir ólíkar aðstæður. Þær allra minnstu er hægt að taka með sér í útileguna til að hlaða síma eða myndavél en stærri gerðirnar segja Ágúst og Einar að gætu til að mynda nýst eigendum báta eða húsbíla.

Rafbíll hlaðinn með rafmagni frá Trinity-túrbínu. Mynd/Janulus

„Hún er hönnuð þannig að þú getur auðveldlega brotið hana saman og komið henni fyrir í skottinu,“ segir Einar. „Þannig að hægt er að nota hana til að hlaða rafmagnsbíl eða hafa bara með til öryggis. Það er vaxandi markaður sem við erum að horfa nokkuð til.“

Framleiða túrbínurnar í Kópavogi
Fyrirtækið Janulus, sem einnig vakti athygli í byrjun árs fyrir þróun sína á TOB-snúrunni svokölluðu, er nýflutt í húsnæði við Dalveg í Kópavogi þar sem bræðurnir ætla að hefja framleiðslu á Trinity-vélinni í byrjun nóvember. Þegar hafa mörg hundruð stykki verið pöntuð í gegnum Kickstarter, þar af flest til Bandaríkjanna. Um miðjan nóvember eiga þeir svo von á tökuliði CBS.

Snjallsími hlaðinn með smárri túrbínu. Mynd/Janulus

„Okkur var fyrst boðið að fara út í viðtal til þeirra í Los Angeles, en okkur fannst það fullsnemmt og báðum um að fara frekar á nýju ári,“ segir Ágúst. „Þá segir framleiðandinn þeirra sem var að pæla í þessu: „How crazy would it be if I went to Iceland?“ Svo var bara ekkert aftur snúið.“

Að sögn þeirra bræðra mun CBS taka upp hér á landi í þrjá daga, til að kynna sér vöruna, framleiðsluna og orkumál á Íslandi almennt. Tilgangurinn sé meðal annars sá að rannsaka hvernig hönnun Ágústs og Einars geti hjálpað Bandaríkjamönnum að innleiða betur endurnýjanlega orku.

„Við erum að opna nýjan vinkil í vindtúrbínum,“ útskýra þeir bræðurnir. „Vindorka hefur ekki verið samkeppnishæf við sólarorku vegna kostnaðar. Með þessu tæki er vindorka í fyrsta sinn orðinn alvöru valkostur.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
0,78
4
241.107
HAGA
0,58
1
252
REITIR
0,33
4
31.487
ARION
0,25
3
15.919
REGINN
0,12
1
242

Mesta lækkun dagsins


Félag
Br.%
Fjöldi
Velta*
BRIM
-2,77
9
131.656
SKEL
-1,15
1
11.580
SYN
-0,94
4
25.388
FESTI
-0,59
1
25
VIS
-0,39
2
196
Velkomin á Vísi. Þessi vefur notar vafrakökur. Sjá nánar.